Յուրի Խաչատուրովն ու Սեյրան Օհանյանն այդպես էլ չվերադարձան դատարանի դահլիճ
Երկար ընդմիջումից հետո վերադառնալով՝ դատավոր Աննա Դանիբեկյանը սկսեց կարծիքներ հարցնել Յուրի Խաչատուրովի և Սեյրան Օհանյանի, ինչպես նաև նրանց փաստաբանների բացակայության վերաբերյալ:
Դատախազ Գևորգ Բաղդասարյանը հայտարարեց, որ քրեական հետապնդումը դադարեցնելու մասին որոշումը պետք է կայացվի դատական նիստի ընթացքում: Մեղադրյալներից երկուսի և նրանց փաստաբանների բացակայությունը հաշվի առնելով՝ դա հնարավոր չէ: Պետրոս Պետրոսյանը միացավ իր գործընկերոջ կարծիքին:
«Հայտարարվեց, որ ամբաստանյալները և նրանց փաստաբանները ներկա չեն: Հետաքրքիր է՝ ո՞ր հոդվածով են նրանք ամբաստանյալներ, և ինչո՞ւ է խոսվում պաշտպանության մասին: Եթե մենք խոսում ենք Յուրի Խաչատուրովի և Սեյրան Օհանյանի մասին, ապա ինչո՞ւ են նրանք ամբաստանյալներ և ինչից են պաշտպանվում, եթե հոդված չկա: Այս պահին իմ պաշտպանյալին մեղադրում են հոդվածով, որը չկա ՔՕ-ում»,-վրդովմունք հայտնեց Հայկ Ալումյանը` նշելով դատավորի գործողությունների անօրինականությունը:
«Քրեական հետապնդում է իրականացվում է գոյություն չունեցող հոդվածով: Ինչի՞ եք Դուք վերածել օրենսդրությունն ու դատարանը»,-ասաց փաստաբանը՝ դատավորից պահանջելով դադարեցնել 300.1-րդ հոդվածով քրեական հետապնդումը: Նման կարծիք հայտնեց նաև փաստաբանց Արամ Վարդևանյանը: Փաստաբանը հիշեցրեց, որ գործի դադարեցման մասին դատավորի որոշումը չի կարող պայմանավորված լինել որևէ մեկի ներկայությամբ կամ բացակայությամբ, դա հրամայական է:
Հիշեցնենք, որ մարտի 25-ին ՍԴ-ն հրապարակել էր որոշման եզրափակիչ մասը, իսկ մարտի 29-ի երեկոյան՝ 42-էջանոց լրիվ տեքստը: ՍԴ որոշումը վերջնական է և ենթակա չէ բողոքարկման: ՍԴ-ն 300.1 հոդվածը համարել էր անորոշ իրավունքի և մեղսագրվող արարքի տեսակետից, պարզ չէ, թե ինչ կարգի տապալման մասին է խոսքը՝ հաշվի առնելով, որ հոդվածն ընդունվել է մի Սահմանադրությամբ, իսկ փորձել են կիրառել մեկ այլ Սահմանադրությամբ:
ՀՀ երկրորդ նախագահ Ռոբերտ Քոչարյանը, ՀԱՊԿ նախկին գլխավոր քարտուղար Յուրի Խաչատուրովը, պաշտպանության նախկին նախարար Սեյրան Օհանյանը և նախկին փոխվարչապետ Արմեն Գևորգյանը մեղադրվում են հենց այդ հոդվածով՝ սահմանադրական կարգի տապալում: Փաստացի, դատարանը պետք է դադարեցնի այդ հոդվածով քրեական հետապնդումը վերը թվարկված անձանց, ինչպես նաև նմանատիպ մեղադրանքով այդ գործի շրջանակում անձանց նկատմամբ:
Արմեն Գևորգյանի փաստաբան Էրիկ Ալեքսանյանը նույնպես պահանջեց դադարեցնել իր պաշտպանյալի նկատմամբ քրեական հետապնդումը ՔՕ 300.1-րդ հոդվածով:
Փաստաբան Արամ Վարդևանյանը մեջբերեց ՔԴՕ 35-րդ հոդվածը, ըստ որի` դատարանը, հայտնաբերելով հետագա քրեական հետապնդման խոչընդոտները, ինքը պետք է միջոցներ ձեռնարկի այն դադարեցնելու համար, ինչը դատարանը չի անում: «Մեղադրող կողմը պնդում է, որ քանի որ Սահմանադրական դատարանը չի փոխել մեղադրյալի կարգավիճակը, նրանք չեն դադարում այդպիսին լինել: Սա ֆորմալիստական մոտեցում է՝ ոչնչով չարդարացված: Երկու մեղադրյալի նկատմամբ հետապնդումը պետք է դադարեցվի, մյուս երկուսի գործը պետք է շարունակվի, քանի որ ներկա են բոլոր կողմերը»,-ասաց փաստաբան Արամ Օրբելյանը: Նա շեշտեց, որ Սահմանադրական դատարանի որոշումից հետո պարզապես մեղադրանք չկա: Փաստաբանը թողեց հարցի տեխնիկական կողմը, որը որոշելու է դատարանը: «Եվ դատախազությանը պարտավորեցրեք ներողություն խնդրել»,-եզրափակեց Օրբելյանը, տեղեկացնում է News.am-ը: