Վարդանյանը՝ կալանավորված պատգամավորների ազատության համար պայքարելու մասին (ՏԵՍԱՆՅՈՒԹ)

Ի՞նչ դուք կանեիք, եթե Հայաստանի որևէ նախկին իշխանություն աներ այն, ինչ անում է այս իշխանությունը: Այս մասին, այսօր՝ հոկտեմբերի 22-ին, մամուլի ասուլիսի ժամանակ նշեց ԱԺ «Հայաստան» խմբակցության պատգամավոր, ՀՅԴ անդամ Քրիստինե Վարդանյանը՝ դիմելով քաղհասարակության ներկայացուցիչներին, տեղեկացնում է News.am:

 


«Ե՞րբ եք տեսել, որ ժողովրդի կողմից ընտրված պատգամավորները լինեն կալանքի տակ: Երբ եք տեսել, որ քաղաքապետի թեկնածուն բանտարկված վիճակում մասնակցի ընտրություններին, ընտրության օրը ներխուժեն շտաբեր, ամեն տեսակ ճնշումներ անեն, փռեն ասֆալտին, ծեփեն պատերին: Այս պայմաններում Սյունիքում կնոջը տանեն ոստիկանական բաժանմունք և ստիպեն բողոք գրել սեփական քաղաքապետի դեմ, և այս ամենի նկատմամբ «քաղհասարակությունը» փակի իր աչքերն ու ասի՝ ժողովրդավարական գործընթաց է տեղի ունենում:

Այս իշխանությունը թռիչքներով շարունակում է նահանջել ժողովրդավարությունից և Հայաստանում շատ ավելի վատ է վիճակը ժողովրդավարության առումով, քան մինչև այս մարդկանց գալը»,-ասաց նա:

ՀՅԴ-ական գործիչը համոզմունք հայտնեց, որ իշխանությունը փորձելու է ամեն ձև այս ընտրություններում իրենց պարտությունն ու ֆիասկոն բացատրել ու ներկայացնել որպես ժողովրդավարության հաղթանակ. «Ոչ, իրենք տապալվել են, ամեն ինչ արել են, որպեսզի այսպիսի արդյունք մենք չունենանք, իրենք դրա համար չեն խորշել ոչ մի միջոցից, բայց նույնիսկ այդ ճնշումների դեպքում մարդիկ գնացել և հայտնել են իրենց կարծիքը: Իրենց քվեով մարդիկ պատասխանել են այն մեղադրանքներին, որոնք ներկայացված են Առուշ Առուշանյանին: Սա ցույց է տալիս, որ դեռևս կա դիմադրության ռեսուրսը Հայաստանում»,-ասաց պատգամավորը:

Նա հայտարարեց, որ հայաստանում չկա ՔՊ քաղաքական ուժ, կա Նիկոլ Փաշինյան, որ կարողանում է ինչ-որ քանակի մարդկանց խաբել, բայց ինքն էլ գիտի, որ գնալով ավելի քիչ թվով մարդկանց է կարողանում խաբել:

Դիտարկմանը, որ իրենք կարծես մոռացության են մատնել և չեն պայքարում իրենց կալանավորված պատգամավոր գործընկերների ազատության համար, Քրիստինե Վարդանյանն ասաց. «Եթե Հայաստանում լիներ 2020-ին նախորդող իրականությունը, երևի ամեն օր կտեսնեիք պայքարը, բայց մենք ցավոք սրտի ունենք բառի ամենավատ իմաստով աննախադեպ իրականություն, անվտանգության ճգնաժամ, աննախադեպ սպառնալիքներ, որոնք չեն թողնում կենտրոնանալ այդ հարցի վրա: «Հայաստան» դաշինքն արել է ամեն անհրաժեշտը, որ այդ մարդիկ օր առաջ գտնվեն ազատության մեջ: Բայց դա չի վերածվել պոպուլիստական ինչ-որ բան ցույց տալու, որովհետև մենք կարիք չունենք ցույց տալու, որ մեր ընկերներին պաշտպանում ենք: Ուղղակի ավելի կարևոր հարցեր կան այսօր Հայաստանում: Այսօր Հայաստանում գլխավոր օրակարգը Հայաստանի լինել-չլինելու օրակարգն է»: Նա տեղեկացրեց, որ այսօր դաշնակցական շուրջ 40 ընկերների նկատմամբ ամենատարբեր քրգործեր են հարուցված:

Անդրադառնալով իշխանությունների դեմ արդյունավետ պայքար մղելուն, ընդդիմադիր պատգամավորը նկատեց, որ ոչ ոք չի էլ պնդում, թե խորհրդարանական պայքարով կարելի է հասնել իշխանափոխության, դա ընդամենը գործիքներից մեկն է. «Լկտիության սահմանն անցած իշխանությունը շատ խելոք, թռչված մկան նման գալու է, կանգնելու է ամբիոնի մոտհնազանդ պատասխանելու է հարցերին, երբ որ Բաղրամյան պողոտայում լինելու են մարդիկ, որոնք իրենց գնահատականն են տալու իշխող թիմին: Միայն հանրային ճնշումն է ունալ այս իշխանությունների հարցը լուծել: Բայց հանկարծ այնպես չանել, որ հանրային ճնշումը մսխվի, գնա, որովհետև հիասթափության նոր ալիքին մարդիկ էլ չեն դիմանա: Իհարկե, կա հիասթափություն, որովհետև մարդիկ մի բանի համար են մեզ ձայն տվել՝ հասնել իշխանափոխության: Դա տեղի չի ունեցել: Հիմա եևրկու ելք ունենք, կամ նեղանանք մեզնից, մեր ընտրողներից ու թևերը ներքև իջեցնենք ու ասենք՝ չստացվեց մեզ մոտ, կամ կռիվ տալ: Ես ընտրում եմ երկրորդ տարբերակը»,-ասաց պատգամավորը:

Նա նկատեց, որ իրենց պատգամավոր ընկերներին կալանավորելով իշխանությունը մեսիջ է հղել իրենց խմբակցության պատգամավորներին, որ մնացեք չափներիդ մեջ, թե չէ կարժանանք նույն բախտին. «Մարտահրավերն ընդունված է: Դա մեզ համար ոչինչ չի նշանակում: Մենք մեր պայքարը շարունակելու ենք»: