Աբխազիան ճանաչել է ԴԺՀ-ի ու ԼԺՀ-ի անկախությունը
Աբխազիայի նախագահ Ասլան Բժանիան ստորագրել է համապատասխան հրաման ԼԺՀ-ի ու ԴԺՀ-ի անկախությունը ճանաչելու մասին: Այդ մասին նշված է Բժանիայի հայրենակիցներին ուղղված ուղերձում, որը հրապարակվել է նախագահի պաշտոնական կայքում, հաղորդում է «Էխո Մոսկվին»:
Նախագահը նաև ելույթ է ունեցել պետական հեռուստատեսության եթերում: Նա վստահություն է հայտնել, որ Աբխազիայի ամբողջ բնակչությունը սատարում է այդ որոշումը:
Հիշեցնենք, որ ՌԴ նախագահ Պուտինը փետրվարի 21-ին հայտարարել էր Դոնեցկի Ժողովրդական Հանրապետության ու Լուգանսի Ժողովրդական Հանրապետության անկախությունն անհապաղ ճանաչելու մասին:
Ավելի վաղ այդ խնդրանքով ՌԴ առաջնորդին դիմել էին Դոնեցկի ու Լուգանսկի ինքնահռչակ հանրապետությունների ղեկավարները: Երկուշաբթի Անվտանգության խորհրդի անդամները սատարել էին այդ նախաձեռնությունը՝ նշելով, որ Ուկրաինան Ռուսաստանին ընտրություն չի թողել:
Ավելի ուշ՝ փետրվարի 24-ին, Վլադիմիր Պուտինը հայտարարել էր Ուկրաինայում ռազմական գործողություն սկսելու մասին, տեղեկացնում է News.am-ը:
