Ընդդիմադիրները շրջափակել են նաև Անվտանգության խորհրդի շենքը (ՏԵՍԱՆՅՈՒԹ)
«Դիմադրություն» շարժման անդամներն ու նրանց կողմնակիցները շրջափակել են նաև ՀՀ Անվտանգության խորհրդի շենքը։
ՀՀ ԱԺ փոխխոսնակ, «Դիմադրություն» շարժման անդամ Իշխան Սաղաթելյանը շնորհակալություն հայտնեց ակցիայի մասնակիցներին։
«Նախօրոք սահմանված ժամանակ չկա, թե որքան պետք է շրջափակված մնան մուտքերը, շրջափակում ենք այնքան, որքան ցանկանում է ժողովուրդը։ Մեր այսօրվա ակցիայի նպատակը պարզ է և հստակ` մեր պայքարը սկսելու առաջին օրվանից ասել ենք` բոլոր այն պետական հաստատությունները, որոնք չեն սպասարկում հայ ժողովրդի շահերը` պետք է շրջափակվեն, խոչընդոտելու ենք իրենց գործունեությունը»,- նշեց Սաղաթելյանը։
Նրա խոսքով` նախագահականն ու նախագահ Վահագն Խաչատուրյանը ոչ մի առնչություն չունեն պետական պաշտպանության և երկրի հետ, քանի որ, ըստ Սաղաթելյանի, Խաչատուրյանը ՔՊ-ի ներկայացուցիչն է։
Արդեն 1 ժամից ավելի է, ինչ փակ են նաև ՀՀ նախագահի նստավայրի բոլոր մուտքերն ու ելքերը։
Նշենք, որ ՀՀ Նախագահ Վահագն Խաչատուրյանը այս պահին երկրում չէ, նա Դավոսում մասնակցում է տնտեսական համաժողովին։
Երեկ կայացած հանրահավաքում «Դիմադրություն» շարժման անդամ, ԱԺ փոխխոսնակ Իշխան Սաղաթելյանը խնդրեց, որ առավոտ շուտ շատերը գան ու միանան բողոքի ակցիային, որպեսզի պարալիզացնեն ամբողջ քաղաքը, շրջափակեն այն շենքը, որն ուզում են։
Sputnik Արմենիա
