Սուրեն Պետրոսյան. Աղավնոն համակարգային ձևով հանձնվում է (ՏԵՍԱՆՅՈՒԹ)

Երեկ և այսօր Աղավնոն լքել են բազմաթիվ քաղաքացիներ, սակայն Աղավնո մուտք գործած քաղաքացիների թիվն այս պահին գերազանցում է Աղավնոն լքած քաղաքացիների: Այս մասին ֆեյսբուքյան լայվով ասաց «Ժողովրդավարական համախմբում» կուսակցության ղեկավար Սուրեն Պետրոսյանը` հավելելով, որ, այնումենայնիվ, Աղավնոյում գտնվող քաղաքացիների թիվը բավարար չէ, որպեսզի իրենք կարողանան բեկել գործընթացի տրամաբանությունն ու էությունը:

«Վերջին օրերին կարծես թե ձևավորվել է մի մտայնություն, որ այլևս Բերձոր, Սուս և Աղավնո համայնքների ճակատագիրը վերջնականապես վճռված է: Ես ձեզ ևս մեկ անգամ ամենայն պատասխանատվությամբ հայտարարում եմ` այս պահին որևիցե կերպ վճռված չէ այս համայնքների ճակատագիրը, սակայն, ցավով պետք է արձանագրեմ, որ գոնե այն ինչի հետ ես առնչվեցի այս վերջին օրերին և այն մարդկանց հետ, ես կարող եմ անել մի ցավալի եզրակացություն, որ Աղավնոն համակարգային ձևով հանձնվում է: Խոսքն ամենևին էլ չի վերաբերում Աղավնոյի բնակիչներին, խոսքս ավելի բարձր քաղաքական մակարդակների մասին է»,- ասաց նա:

Սուրեն Պետրոսյանի խոսքով`այս պայքարն առաջին հերթին ինքնության պայքար է. «Քաղաքական ուժերը, որոնք դեմ էին Լաչինի միջանցքի հանձնմանը, միայն դատապարտող կոչեր արեցին, և այդպես էլ որևէ գործողություն դրան չհետևեց, ի՞նչ եք կարծում, քաղաքականությունը սահմանափակվում է միայն կոչերո՞վ, ե՞րբ եք տեսել, որ պետությունը, պետականությունը կամ հողը միայն կոչերով պահեն, կոչերով պահել չի կարելի»:

Սուրեն Պետրոսյանը նորից կրկնեց, որ իրենք ունեն բավականաչափ ժամանակ և եթե Աղավնոյում լինի 300-500 քաղաքացի իրենք կբեկեն ողջ ընթացքը:

News.am