Մոսկվայում քննարկվել է Ադրբեջանին զենք վաճառելու հարցը
Հարցը քննարկվելու է Հայաստանի ու Ռուսաստանի պատգամավորների, նաև ՀԱՊԿ–ի նրանց գործընկերների հետագա հանդիպումների ժամանակ։
Որոշ երկրներին ռուսական զենքի վաճառքի հարցը բարձրացվել է, ու գործընկերները ըմբռնումով են մոտեցել դրան։ Այս մասին ՀՀ Ազգային ժողովի տարածաշրջանային և եվրասիական ինտեգրման հարցերի մշտական հանձնաժողովի նախագահ Միքայել Մելքումյանը ասաց Մոսկվայում Պետդումայի պատգամավորների պատվիրակության հետ հանդիպումից հետո։
Նրա խոսքով՝ նիստի ընթացքում բազմաթիվ հարցեր են քննարկվել, այդ թվում՝ ՀԱՊԿ անդամ երկրների կողմից զենքի վաճառքն այն պետություններին, որոնք խնդիրներ ունեն ՀԱՊԿ անդամ երկրներից մեկի հետ:
«Իհարկե, Ռուսաստանը զենք է վաճառում իր պետական շահերից դրդված։ Բայց եթե առաջարկվում է բարձր հզորությամբ ու գործողության հեռավոր շառավիղով հարձակողական զենքի վաճառքը երրորդ երկրներին չի կարող անհանգստություն չառաջացնել, նույնիսկ հաշվի առնելով, որ Հայաստանը նույն զենքն արտոնյալ գներով է ստանում։ Ամեն դեպքում Հայաստանը ՀԱՊԿ–ում Ռուսաստանի դաշնակիցն է ի տարբերություն Ադրբեջանի»,– ասաց Մելքումյանը։
Նա նշեց, որ հարցը քննարկվել է Պետդումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի ղեկավար Լեոնիդ Կալաշնիկովի, Պետդումայի փոխխոսնակ Պյոտր Տոլստոյի ու նրանց գործընկերների հետ։ Որոշվել է քննարկել այդ հարցը Հայաստանի ու Ռուսաստանի պատգամավորների` ՀԱՊԿ–ի գործընկերների հետ հանդիպման ժամանակ։
Հիշեցնենք` Ռուսաստանի Անվտանգության խորհրդի քարտուղար Նիկոլայ Պատրուշևի հայաստանյան այցի ժամանակ երրորդ երկրների զենք մատակարարելու հարցը քննարկվել է ՀՀ Անվտանգության խորհրդի քարտուղար Արմեն Գրիգորյանի հետ, տեղեկացնում է Sputnik Armenia-ն։
