ԱԺ ներկայացուցիչը խնդրել է ՍԴ-ից հետաձգել հուլիսի 7-ին նշանակված գործի քննությունը

Սահմանադրական դատարանում ՀՀ ԱԺ ներկայացուցիչը միջնորդություն է ներկայացրել ՍԴ՝ խնդրելով հետաձգել 2020թ հուլիսի 7-ին նշանակված գործի քննությունը, ԱԺ-ին տրամադրել ՄԻԵԴ և ՎՀ խորհրդատվական կարծիքների հայերեն թարգմանությունները, ինչպես նաև ողջամիտ ժամկետ այդ կարծիքներին ծանոթանալու համար։ Այս մասին հայտնում են ԱԺ-ից։

Նշենք, որ ՀՀ երկրորդ նախագահ Ռոբերտ Քոչարյանի գործով 300.1 հոդվածի սահմանադրականության հարցը որոշելու վերաբերյալ գործի քննությունը ՍԴ-ում նշանակված է հուլիսի 7-ին:

Նշենք, որ օրերս Ռոբերտ Քոչարյանի պաշտպանները հետ էին վերցրել իրենց դիմումները, քանի որ «Լուսավոր Հայաստան» խմբակցությունը հայտարարել էր, որ Սահմանադրության փոփոխությունների նախագծի սահմանադրականությունը վիճարկող ԲՀԿ-ի նախաձեռնած ստորագրահավաքին կմիանա միայն այն բանից հետո, երբ ՍԴ-ն կքննի և որոշում կկայացնի Ռոբերտ Քոչարյանի գործով։

Պաշտպաններն այս կերպ որոշել էին իրենց կողմից վերացնել այդ խոչընդոտը։

Այնուամենայնիվ, դեռևս ՍԴ-ում է Երևանի ընդհանուր իրավասության առաջին ատյանի դատարանի դիմումը՝ կրկին Ռոբերտ Քոչարյանի գործով։ Այս պահին անորոշ է, թե ինչ կանի ՍԴ-ն հուլիսի 7-ին, տեղեկացնում է News.am-ը։