Ա․Ղազինյան. Մեզանից թաքցվել է առաջին վարակակրի փաստը

Նախաքննական մարմինը հաստատված է համարել, որ ՀՀ-ում նոր կորոնավիրուսով վարակման առաջին դեպքն արձանագրվել է հունվարի վերջին և փետրվարի սկզբին։ Այս մասին այսօր մամուլի ասուլիսի ժամանակ հայտարարեց «Մեկ Հայաստան» կուսակցության նախագահ Արթուր Ղազինյանը։

«Առաջին հիմնական փաստը, որ խոստացել էինք ներկայացնել որպես սենսացիոն բացահայտում, ՀՔԾ-ի պատասխանի մեջ հետևյալ հատվածն է. «Հարկ է նշել, որ Արթուր Ղազինյանի կողմից կորոնավիրուսի մասին դատողություններ են արվել՝ ելնելով ներկայիս իրավիճակից, երբ ՀՀ-ում արձանագրված առաջին հաստատված դեպքից անցել է ավելի քան հինգ ամիս»։ Խոսքը գնում է հունիսի վերջ, հուլիսի սկզբի մասին և երբ հինգ ամիս հետ ենք գնում, ստացվում է՝ ՀՔԾ-ն հաստատված է համարել, որ Հայաստանում կորոնավիրուսի առաջին դեպքը գրանցվել է հունվարի վերջ և փետրվարի սկզբին»,-ասաց Արթուր Ղազինյանը։

Վերջինս մտաբերեց՝ հունիսի 6-ին՝ պարետատան նիստից հետո կայացած ճեպազրույցի ժամանակ, Նորքի ինֆեկցիոն կլինիկայի տնօրենը 4 անգամ ասաց՝ փետրվար ամսից. «Ե՛վ Մհեր Դավիդյանցը, և՛ ՀՔԾ-ն եղել են բացառապես ազնիվ մեր քաղաքացիների հետ՝ ի տարբերություն ՀՀ վարչապետի և Առողջապահության նախարարի։ Նրանք արդեն հաստատված տրամադրել են, որ փետրվարին Հայաստանում եղել է հաստատված վարակակիր, ինչը Փաշինյանը փորձեց ապարդյուն հերքել»,-նշեց Արթուր Ղազինյանը՝ հավելելով, որ ՀՔԾ-ն ամենայն հավանականությամբ կհայտարարի, որ իր այդ 5 ամիս պնդումը եղել է վրիպակ։ Արթուր Ղազինյանն ընդգծեց՝ ՀՔԾ-ն և Մհեր Դավիդյանցը հաստատել են, որ մեզանից թաքցվել է առաջին վարակակրի փաստը. «Դա արվել է մեկ նպատակով, ինչը համապարփակ ներառված է Նիկոլ Փաշինյանի հետևյալ հայտարարության մեջ՝ կորոնավիրուսի ամենամեծ վտանգը դա խուճապն է։ Այսինքն խուճապ չտարածելու, մարդկանց մոտ զգոնությունը թուլացնելու, դրա վտանգավորության աստիճանըս նվազեցնելու և իրենց համար ցանկալի քանակով ապրիլի 5-ին նախատեսված հանրաքվեի մասնակցությունն ապահովելու նպատակով»,-ասաց Արթուր Ղազինյանը, տեղեկացնում է PastInfo.am։