Թաթուլ Մանասերյան. 55 000 նոր աշխատատեղերի մասին թվերը չափազանցված են

55 000 նոր աշխատատեղերի մասին ՀՀ վարչապետ Նիկոլ Փաշինյանի ներկայացրած թվերը չափազանցված են: Այս մասին այսօր լրագրողների հետ զրույցում ասաց տնտեսագետ Թաթուլ Մանասերյանը: Նրա խոսքով՝ վերջին տվյալների համաձայն՝ այդ աշխատատեղերը եղել են 20 000-ը, ինչը խոսում է այն մասին, որ վիճակագրական ծառայությունը վատ է աշխատում և հակասական տեղեկություն է ներկայացնում:

«Տնտեսական հեղափոխություն տերմինն անընդունելի է, և եթե դրա տակ իշխանության որոշ ներկայացուցիչներ զարգացում են ենթադրում, ապա դրա մասին դեռ պետք չէ խոսել՝ հաշվի առնելով աճի ցածր տեպերը: Այժմ տնտեսությունը վերականգնման փուլում է, և ցուցանիշները պետք է երկնիշ լինեն: Հայաստանի համար 7 տոկոս աճը շատ քիչ է, քանի որ տնտեսությունը վերականգնելու համար այլ թվեր են անհրաժեշտ, և պետական ապարատում դա, կարծես, գիտակցում է միայն վարչապետը»,- նշեց նա:

Մանասերյանը նկատեց, որ դեռևս որևէ փոփոխություն չկա: «Անհնար է արտասահմանցի ներդրողներ ներգրավել, քանի դեռ չունենք ներքին ներդրողներ, ինչի մասին վկայում են բանկերում դեպոզիտների քանակը, ինչն էլ համեմատելի է երկրի արտաքին պարտքի հետ և կազմում է մոտ 6 մլրդ: Այսինքն, մարդիկ դեռևս չեն ցանկանում գումար ներդնել տնտեսության մեջ: Ըստ էության, IT-ից բացի, ոչինչ չի զարգանում»,- հավելեց փորձագետը: Նա նաև նշեց, որ աղքատության ցուցանիշները նույն մակարդակի վրա են գտնվում, և դեռևս փոփոխություն չկա, տեղեկացնում է NEWS.am:

Основная тема:
Теги: