Շիֆը մտահոգված է Ադրբեջանի սադրիչ գործողություններից
ԱՄՆ կոնգրեսական, դեմոկրատ Ադամ Շիֆը անհանգստացած է վերջին օրերին Հայաստանի հետ սահմանի երկայնքով Ադրբեջանի կողմից սադրիչ և ապակայունացնող գործողություններից, այդ թվում` հայ զինծառայողների հրետակոծությունից: Այս մասին նա գրել է Facebook-ի իր էջում:
«Այս գործողությունները սպառնում են զինվորների ու քաղաքացիական անձանց կյանքին և մեծացնում են հակամարտության սրման վտանգը, ինչը կարող է կործանարար հետևանքներ ունենալ տարածաշրջանի համար, հատկապես գլոբալ համավարակի թեժ շրջանում:
Այս գործողությունները պետք է նաև դիտարկվեն Հայաստանի և Արցախի հանդեպ Ադրբեջանի ռազմատենչ հռետորաբանության, ինչպես նաև իր սահմանների միջազգային մոնիթորինգ թույլ չտալու համատեքստում: Ես Պետդեպարտամենտին կոչ եմ անում բոլոր կողմերին բացատրել զսպվածության, դիվանագիտության և լարվածության նվազեցման անհրաժեշտությունը»,- ասել է նա, տեղեկացնում է News.am-ը։
