Անհրաժեշտ ձայների բացակայության պատճառով ՍԴ նախագահ չի ընտրվել

Երվանդ Խունդկարյանը չի ընտրվել ՍԴ նախագահ, քանի որ անհրաժեշտ թվով կողմ ձայներ չի ստացել:

Սահմանված ժամկետներում ՍԴ նախագահի նոր ընտրություններ կկազմակերպվեն:

Ինչ վերաբերում է ՍԴ փոխնախագահի ընտրությանը, ապա աշխատանքային օրվա ավարտով պայմանավորված՝ նիստն ընդմիջվել է մինչև երկուշաբի, ժամը 11:00-ն:

ՍԴ դատավոր Էդգար Շաթիրյանը տեղեկացրեց, որ ինքը մասնակցել է քվեարկությանը, առաջադրված թեկնածուին մասնագիտական հարցեր է ուղղել: Իսկ թե առհասարակ քաղաքական հարցադրումներ եղե՞լ են՝ պատասխանեց.

«Թեկնածուին ուղղվել են մեծաթիվ հարցեր, որոնք մասամբ աղերս ունեին ձեր կողմից հնչեցված որոշ դատողությունների հետ»:

Դեմ արտահայտվողների մասին էլ նշեց, որ կոռեկտ չի համարում անուններ հնչեցնել: Ինչ վերաբերում է ուղղորդումներին, ապա իր մասով հավատացրեց, որ նման բան չի եղել.

«Ընտրությունն իմ ներքին համոզմամբ եմ կատարել»:

Լրագրողները նաև հետաքրքրվեցին, թե Շաթիրյանը նոր թեկնածուի անհրաժեշտություն տեսնո՞ւմ էր:

«Էական չէ, անցած փուլ է»,- ասաց նա:

Իր հնարավոր առաջադրման մասին էլ ընդգծեց, որ տեսականորեն ոչինչ չի բացառում տեղեկացնում է Aysor.am-ը: