Կյանքը՝ Դավիթ Բեկում․ Գյուղն ամուր պահում ենք, մենք հզոր ենք ու հաղթելու ենք (ՏԵՍԱՆՅՈՒԹ)
Գյուղում տրամադրությունը մարտական է, վստահ ենք, որ հաղթելու ենք։ Այսպես են արձագանքում Սյունիքի մարզի Դավիթ Բեկ գյուղի բնակիչները՝ նոյեմբերի 2-ին իրենց բնակավայրի ուղղությամբ թշնամու կողմից հրետանային միջոցներից կրակ վարելուց օրեր անց։
Հրետակածության հետևանքով մեկ քաղաքացիական անձ էր զոհվել, երկուսն էլ վիրավորվել էին։ Զոհը հրետակածության ժամանակ ավտոմեքենայի ղեկին է եղել։
Զինուժ մեդիայի հետ զրույցում բնակիչներից մեկը պատմում է․
«Վիրավորներից մեկը կամավորական էր, եկել էր հանգստանալու»։
Գյուղի որոշ տների ապակիները, դռները վնասվել են։ Այդուհանդերձ գյուղում խուճապ չկա։
«Ով էլ որ մտածում է, թե մենք պետք է մեր հողն ու գյուղը թողնենք, թող ինքը հեռանա էստեղից։ Մենք գյուղն ամուր պահում ենք, կանգնած ենք, հզոր ենք ու հաղթելու ենք»,-ընդգծում է նա։
Գյուղի տարեցներն էլ նշում են՝ 1990-ականներին պատերազմ են տեսել, հիմա այլևս չեն վախենում, սովոր են։
«Մեր գյուղացիները այնքան փորձ ունեն 1992թ․-ից սկսած, որ հիմա նույն ոգով սահմանը պահում են և շատ ամուր»,- նկատում է նա։
Հրետակոծվել են ոչ միայն բնակելի տները, այլև գերեզմանատունը, տեղեկացնում է News.am-ը։
