Արցախի հեղափոխական կուսակցության նախագահ Արթուր Օսիպյանը, որն արդեն 20 օր է` հացադուլի մեջ է, ի նշան բողոքի հրաժարվում է բժշկական զննությունից, սակայն նրա մոտ արդեն սկսվում են առողջական խնդիրներ։ Այս մասին Sputnik Արմենիայի հետ զրույցում ասաց նրա պաշտպան Դավիթ Հովհաննիսյանը։
«Օսիպյանը նաև անցած շաբաթ է հրաժարվել բժշկական զննությունից։ Բժշկական զննություն չի նշանակում, որ գան, քաշը ստուգեն, այլ պետք է լինի բժշկական համալիր հետազոտություն։ Երբ կալանավորը հացադուլ է սկսում, եվրոպական օրենքների համաձայն` նա, բացի կալանավոր լինելուց, նաև բուժառու է դառնում, քանի որ կյանքի և առողջության համար վտանգ է լինում։ Արդեն 22 օր ընդհանրապես հաց չի կերել, իսկ դա ամեն մեկի մոտ մի ձև է արտացոլվում, օրինակ՝ մարդ կա, որ այդքան չի էլ կարող դիմանալ»,– ասաց Հովհաննիսյանը։
Փաստաբանի խոսքով՝ երկու օր առաջ է տեսել Օսիպյանին ու նրա մոտ արդեն իսկ սկսվել էր թուլություն, գլխապտույտներ և այլն։ Ինչ վերաբերում է փաստին, որ մի խումբ անձանց կողմից Արթուր Օսիպյանի համար անձնական երաշխավորություն է ստորագրվել, որպեսզի փոխվի խափանման միջոցը, Հովհաննիսյանը նշեց, որ ՀՀ վերաքննիչ դատարան խափանման միջոցի վերանայման հատուկ բողոք են ներկայացրել։
«Կալանավորումից 4 օր հետո բողոքը ներկայացրել ենք, սակայն դեռևս դատական նիստի նշանակման օր չունենք»,– շարունակեց փաստաբանը։
Հիշեցնենք՝ Արթուր Օսիպյանը մայիսի 18-ին ձերբակալվեց Փաշինյանի հետ վիճաբանությունից հետո։ Մինչ այդ նա սոցիալական ցանցի իր էջում գրել էր. «Թե Նիկոլի տեղը իմացող կա, ասեք` բմբուլները օդ հանեմ։ Բա կերավ մեր միսը»։
Մայիսի 21-ին հայտնի դարձավ, որ Օսիպյանը 2 ամսով կալանավորվել է։ Նրա նկատմամբ քրեական վարույթ է նախաձեռնվել Քրեական օրենսգրքի 330-րդ հոդվածի 2-րդ մասի 3-րդ կետով (բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը, ինչպես նաև այդ նպատակով նյութեր կամ առարկաներ տարածելը), 297-րդ հոդվածի 1-ին մասով (խուլիգանությունը) և 211-րդ հոդվածի 1-ին մասով (քարոզչություն կատարելուն կամ քարոզչություն կատարելուց հրաժարվելուն հարկադրելը կամ քարոզչություն կատարելուն այլ կերպ խոչընդոտելը): Նույն օրը Օսիպյանը հացադուլ է հայտարարել։
