Զատուլինը Փաշինյանի համար անհասկանալի մա՞րդ է

Ի հեճուկս եռակողմ աշխատանքային խմբում ձեռք բերված պայմանավորվածությունների, ինչ-որ միջանցքների մասին հայտարարություններ են տեղի ունենում։ Կառավարության հետ հարցուպատասխանի ժամանակ հայտարարեց վարչապետ Նիկոլ Փաշինյանը։

Ընդ որում, ըստ Փաշինյանի, նման հայտարարություններ են հնչում ոչ միայն ադրբեջանական կողմից։

«Ռուսաստանում էլ անհասկանալի մարդիկ կան, որ փորձում են այդ նարատիվը զարգացնել՝ ի հեճուկս ՌԴ նախագահի կողմից արված հայտարարությունների, ստորագրված փաստաթղթերի, ի հեճուկս ՌԴ արտաքին գործերի նախարարության, փոխվարչապետի կողմից արված հայտարարությունների»,–ասաց Փաշինյանը։

Այսինքն, ըստ վարչապետի, շատ հարցեր կան, որոնց շուրջ ակտիվ և էական քննարկում պետք է տեղի ունենա Սոչիում հոկտեմբերի 31-ին նախատեսված եռակողմ ու ՌԴ նախագահի հետ նախատեսված երկկողմ հանդիպման ժամանակ։

Հիշեցնենք, որ Հայաստան կատարած վերջին այցելության ժամանակ «Երկիր Մեդիա»-ին տված հարցազրույցի ընթացքում ՊՏ Պետգումայի պատգամավոր Կոնստանտին Զատուլինը մեղադրել էր վարչապետին ՀՀ սուվերեն տարածքով «միջանցք» ստորագրելու համար։ «Հնարավոր միջանցքի շուրջ հարցերը պետք է տալ ստորագրողներին, «միջանցքը» ստորագրել է Փաշինյանը», - ասել էր Զատուլինը։

Ավելի վաղ հայտնել էինք, որ հոկտեմբերի 25-ին Զատուլինն էլեկտրոնային փոստին նամակ էր ստացել այն մասին, որ իր մուտքը Հայաստանի Հանրապետություն անցանկալի է։

Նամակում ասվում է, որ վերջին շրջանում պատգամավորի հանրային ելույթները վնաս են հասցնում Հայաստանի և Ռուսաստանի բարեկամական և դաշնակցային հարաբերությունների զարգացմանը։ Զատուլինը պետք է Հայաստան ժամաներ` մասնակցելու իր հիմնադրած Լազարյան ակումբի` հոկտեմբերի 28-ին կայանալիք նիստին։

Sputnik Արմենիա