Իրանի արտգործնախարարը «3+3» ձևաչափը Կովկասում իրավիճակի կայունացման միջոց է անվանել

Հարավային Կովկասում ստեղծված լարված իրավիճակը կարող է կարգավորվել «3+3» ձևաչափի շրջանակում: Այս մասին հայտարարել է Իրանի արտաքին գործերի նախարար Հոսեյն Ամիր Աբդոլլահիանը` Մոսկվայում իր ռուս գործընկեր Սերգեյ Լավրովի հետ բանակցությունների արդյունքների շուրջ համատեղ մամուլի ասուլիսի ժամանակ։

Ձևաչափը ենթադրում է Հարավային Կովկասի երեք երկրների` Հայաստանի, Վրաստանի և Ադրբեջանի, ինչպես նաև տարածաշրջանի երեք մերձավոր հարևանների՝ Ռուսաստանի, Իրանի և Թուրքիայի մասնակցությունը։

«Մենք, իհարկե, պետք է «3+3» մեխանիզմի միջոցով, ինչպես նաև գոյություն ունեցող մեխանիզմների միջոցով, առանց ուժի դիմելու, կարգավորենք հարցերը տվյալ տարածաշրջանում»,-նշել է իրանցի նախարարը։

Աբդոլլահիանը համոզված է, որ շարունակվող լարվածությունը ոչ մի օգուտ չի բերում ո՛չ Հայաստանին, ո՛չ Ադրբեջանին, և անհրաժեշտ է շարժվել դեպի խաղաղություն և կայունություն: Նա նաև դեմ է արտահայտվել տարածաշրջանային գործընթացներին արտաքին միջամտությանը։

Իրանի ԱԳՆ ղեկավարն առաջարկել է այս ձևաչափի նիստն անցկացնել Թեհրանում։

Հիշեցնենք, որ «3+2» ձևաչափով առաջին և առայժմ վերջին հանդիպումը (Վրաստանը մինչ օրս հրաժարվում է մասնակցել հարթակի աշխատանքներին- խմբ.) տեղի է ունեցել 2021 թվականի դեկտեմբերին Մոսկվայում։

Sputnik Արմենիա