Խորհրդարանն առաջին ընթերցմամբ հավանություն է տվել մի շարք աղմկահարույց օրինագծերի

Ազգային ժողովի հունիսի 18-ի նիստում պատգամավորները երկրորդ և վերջնական ընթերցմամբ հավանության են արժանացրել «Ֆինանսական համահարթեցման մասին» օրենքում փոփոխությունները։

Բացի այդ, խորհրդարանականներն առաջին ընթերցմամբ հավանություն են տվել մի շարք այլ օրինագծերի։ Դրանց թվում են՝

«Երևան քաղաքում տեղական ինքնակառավարման մասին» օրենքում լրացումներ կատարելու մասին օրինագիծը,

«Տեղական ինքնակառավարման մասին» օրենքում և հարակից օրենքներում փոփոխություններ և լրացումներ կատարելու մասին օրենքների նախագծերի փաթեթը,

«Պետական սահմանի մասին» օրենքում լրացումներ կատարելու մասին օրինագիծը,

«Էներգետիկայի և էներգաօգտագործման ոլորտում պետական տեխնիկական վերահսկողության մասին» օրենքում և հարակից օրենքներում փոփոխություններ կատարելու մասին օրինագծերի փաթեթը,

«Զանգվածային լրատվության միջոցների մասին» օրենքում և հարակից օրենքներում փոփոխություններ և լրացումներ կատարելու մասին օրինագծերի փաթեթը,

«Զինվորական ծառայության և զինծառայողի կարգավիճակի մասին» օրենքում լրացումներ կատարելու մասին նախագիծը,

«Գեոդեզիայի և քարտեզագրության մասին» օրենքում փոփոխություններ և լրացումներ կատարելու մասին օրինագիծը։

Խորհրդարանականները նաև վավերացրել են մի շարք համաձայնագրեր։ Դրանց թվում են՝

«Հայաստանի Հանրապետության և Մալթայի Հանրապետության կառավարությունների միջև եկամտի կրկնակի հարկման կասեցումը, ինչպես նաև հարկեր չվճարելու և հարկումից խուսափելու դեպքերը կանխելու մասին» համաձայնագիրը,

«Հայաստանի Հանրապետության և Սինգապուրի Հանրապետության կառավարությունների միջև եկամտի կրկնակի հարկման կասեցումը, ինչպես նաև հարկեր չվճարելու և հարկումից խուսափելու դեպքերը կանխելու մասին» համաձայնագիրը, տեղեկացնում է News.am։