Դատարանը մերժել է Աղվան Հովսեփյանի կալանավորման վերաբերյալ պաշտպանների բողոքը

Վերաքննիչ քրեական դատարանը՝ դատավոր Տիգրան Սիմոնյանի նախագահությամբ, մերժել է ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի կալանավորումը ևս երկու ամսով երկարացնելու որոշման դեմ պաշտպանների բողոքը։ Sputnik Արմենիայի հետ զրույցում տեղեկությունը հայտնեց Հովսեփյանի պաշտպան Էրիկ Ալեքսանյանը։

«Որոշումը դեռ չենք ստացել, բայց հենց ստանանք, 15-օրյա ժամկետում կբողոքարկենք Վճռաբեկ դատարանում։ Ներկա պահին քննություն է ընթանում, մենք էլ ակտիվ միջնորդություններ ենք ներկայացնում»,– նշեց Ալեքսանյանը։

Հիշեցնենք` Հատուկ քննչական ծառայությունը սեպտեմբերի 7–ին հայտնել էր, որ Աղվան Հովսեփյանը մեղադրվում է առանձնապես խոշոր չափերով` 190 մլն դրամ կաշառք ստանալու և խարդախության եղանակով 800 մլն դրամ գույքի հափշտակություն կատարելու համար:

Նա մեղադրվում է նաև հանցավոր ճանապարհով ստացված 1 միլիարդ 299 միլիոն դրամի գույքը (փողերի լվացում) օրինականացնելու համար: Ավելի ուշ ՀՔԾ–ն Հովսեփյանին կալանավորելու միջնորդություն էր ներկայացրել։ Հովսեփյանին մեղադրանք է առաջադրվել ՀՀ քրեական օրենսգրքի 310-րդ հոդվածով (ձեռնարկատիրական գործունեությանն ապօրինի մասնակցելը), 311-րդ հոդվածի 4-րդ մասի 2-րդ կետով (կաշառք ստանալը), 178-րդ հոդվածի 3-րդ մասի 1-ին կետով (խարդախությունը) և 190-րդ հոդվածի 3-րդ մասի 1-ին կետով (հանցավոր ճանապարհով ստացված եկամուտներն օրինականացնելը` փողերի լվացումը):

Հովսեփյանն իրեն առաջադրված մեղադրանքը չի ընդունում։

Վերաքննիչ քրեական դատարանը հոկտեմբերի 4-ին մերժել էր նրա կալանքը վերացնելու միջնորդությունը։ Նոյեմբերի 2–ին Աղվան Հովսեփյանի կալանավորումը երկարացվեց ևս երկու ամսով։