ԲԱՔՈՒՆ ՏՐՏՆՋՈՒՄ Է «ՀԱԿԱՀԱՐՁԱԿՄԱՆ» ԴԱԺԱՆ ՊԱՅՄԱՆՆԵՐԻՑ․ «ՁՅՈՒՆ Է ՆՍՏԱԾ»
Ադրբեջանական բանակը «դաժան պայմաններում» «հակահարձակողական» գործողություն է անցկացնում հայկական զորքերի դեմ, այսօր ճեպազրույցում հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության հարցերով բաժնի վարիչ Հիքմեթ Հաջիևը։
«Ռելիեֆն այստեղ դժվարամատչելի է, ինչպես գիտեք՝ հիմնականում լեռնային տարածքներ են։ Բայց, չնայած դրան՝ ադրբեջանական բանակը քայլ առ քայլ առաջ է շարժվում։ Բարձունքին ձյուն է դրել, ծանր կլիմայական պայմաններում, 3300-3500 մետր բարձրության վրա մեր զինվորները խիզախաբար կռվում են, ազատագրում մեր հողերը»։
Ըստ էության՝ սա ադրբեջանցի բարձրաստիճան պաշտոնյայի առաջին խոստովանությունն է, որ Ադրբեջանի ԶՈւ-ն «հակահարձակողական» գործողություններն անցնում են «դաժան պայմաններում»՝ հայտարարություն, որ արվում է լայնածավալ ռազմական գործողությունների վեցերորդ օրը։
Այն մասին, որ ադրբեջանական բանակը հինգ օրվա ընթացքում ոչ մի արդյունքի չի հասել, նշել են ռուսաստանցի ռազմական փորձագետները։
