Չարենցավանն աղ ու հացով է դիմավորել երթի մասնակիցներին

Ժողովրդական շարժման երթը հասել է Չարենցավան (Կոտայքի մարզ)։ Քաղաք մտնելիս երթի մասնակիցներին դիմավորել են աղ ու հացով։ Չարենցավանում տեղավորված փախստական արցախցիները իրենց հետ ժանգյալով հաց են բերել։

Ողջունելով չարենցավանցիներին՝ Բագրատ սրբազանը հիշեցրել է, որ Չարենցավանն առաջ կոչվում էր Լուսավան՝ Լույսի քաղաք, հետո վերանվանվել է և կրել հայ մեծ բանաստեղծ Եղիշե Չարենցի անունը։

«Իսկ Չարենցը ոչ միայն «Երկիր Նաիրիի» հեղինակն է, այլև «Ամբոխները խելագարվածի»։ Ճիշտ ճանապարհով ենք գնում»,- նշել է արքեպիսկոպոսը։

Հիշեցնենք, որ երթը սկսվել է մայիսի 4-ին Տավուշի մարզի Կիրանց գյուղից։ Քաղաքներում և գյուղերում, որոնցով անցնում է երթը, նրա մասնակիցներին դիմավորում են աղ ու հացով։ Ճանապարհին երթին միանում են իշխանությունների քաղաքականությանն անհամաձայն բնակիչները։

Մասնակիցները պահանջում են կանգնեցնել սահմանազատումն Ադրբեջանի հետ ներկայիս տեսքով, դադարեցնել միակողմանի զիջումները, որոնք սպառնալիքի տակ են դնում Հայաստանի գոյությունը։

Ապրիլի 19-ից Կիրանց գյուղի բնակիչները փակ էին պահում ճանապարհը։ Ուժ կիրառելով ոստիկանությունը վերականգնեց երթևեկությունը, միաժամանակ փակեց գյուղը, որտեղ հիմա կարող են գնալ միայն բնակիչները՝ երեք անցակետ անցնելով։

Սահմանազատման արդյունքում Ադրբեջանին են անցնում Հայաստան-Վրաստան ճանապարհը, միակ գազատարը Հայաստանում, ինտերնետ-մալուխը, ռազմավարական նշանակության բարձունքներ։

Երթի մասնակիցները մտադիր են Երևան հասնել մայիսի 9-ին, որպեսզի վերականգնեն մայիսի փառահեղ հաղթանակների ավանդույթները հայ ժողովրդի համար։

News.am