Դպրոցական Յուրի Սարիբեկյանը, որը ատոմային սառցահատով մեկնել էր Հյուսիսային բևեռ, անչափ տպավորված է վերադարձել ուղևորությունից։
«Մինչև հիմա դժվարությամբ եմ հավատում, որ ես դարձել եմ այն քչերից մեկը, ով եղել է Հյուսիսային բևեռում: Ինձ համար մեծ պատիվ էր ներկայացնել Հայաստանը նման մեծածավալ միջազգային նախագծում», – պատմել է Յուրին Հայաստանում Ռուսական տանը։
Սարիբեկյանը Հայաստանը ներկայացրել է «Ռոսատոմի» «Գիտելիքի սառցահատ» գիտալուսավորչական 7-րդ արշավախմբում:
10 օրվա ընթացքում միջազգային թիմը «Հաղթանակի 50 տարի» ատոմային սառցահատով անցել է Մուրմանսկ-Հյուսիսային բևեռ-Ֆրանց Իոսիֆի երկիր-Մուրմանսկ երթուղով: Արշավախմբի կազմում ընդգրկված էին 68 դպրոցականներ և քոլեջների սաներ Ռուսաստանից և 22 այլ երկրներից:
Հյուսիսային լայնության 90° կոորդինատում Յուրին մյուս մասնակիցների հետ բարձրացրել է Հայաստանի դրոշը և միացել խորհրդանշական ակցիային՝ միջազգային շուրջպարին:
«Ես տեսա Արկտիկայի յուրահատուկ բնությունը, ծանոթացա տարբեր երկրների իմ հասակակիցների հետ, նոր գիտելիքներ ձեռք բերեցի և հասկացա, թե որքան հնարավորություններ է բացում գիտությունը։ Այդ պատմությունը ես կհիշեմ ընդմիշտ», – ասել է դպրոցականը։
2024 թվականից միջազգային դարձած մրցույթի շնորհիվ բևեռ են մեկնել աշխարհի 15 երկրի երեխաներ, այդ թվում՝ հայաստանցի դպրոցական Արթուր Շառյանը։ 2025 թվականին Հայաստանից մասնակցել է Ալինա Մնոյանը։
Հիշեցնենք, որ Սարիբեկյանը ռուսական «Ռոսատոմ» պետական կորպորացիայի աջակցությամբ անցկացվող «Գիտելիքի սառցահատ» միջազգային մրցույթի հաղթողներից է: Մեծամոր քաղաքի հիմնական դպրոցներից մեկի շրջանավարտն, ատոմային էներգետիկների ընտանիքից է և «Խաղաղ ատոմ» հասարակական կազմակերպության ակտիվիստ: Նա նույնպես ցանկանում է դառնալ ատոմային մասնագետ։
Sputnik Արմենիա
