«Այս տարի «Չինարենի կամուրջ» մրցույթն անցկացվում է արդեն 25-րդ անգամ, և այս տարիների ընթացքում չինարենն իսկապես դարձել է համաշխարհային լեզու»։ Մայիսի 13-ին «Չինարենի կամուրջ» միջազգային մրցույթի հայաստանյան փուլի բացման ժամանակ դրա մասին հայտարարեց Հայաստանում Չինաստանի արտակարգ և լիազոր դեսպան Լի Սինվեյը:
Դեսպանը լեզուն համեմատել է կամրջի հետ և նշել, որ չինարենի տիրապետումը երիտասարդների առջև գլոբալ հեռանկարներ է բացում:
Իր ելույթում պարոն Լի Սինվեյը խորին հարգանք հայտնեց տեղական մշակույթի նկատմամբ՝ հայերենն անվանելով աշխարհի հնագույն և գեղեցկագույն լեզուներից մեկը: «Ես հատկապես հպարտանում եմ մրցույթին մասնակցող ուսանողներով. դուք արդեն տիրապետում եք աշխարհի ամենաբարդ երկու լեզուներին»,- ընդգծեց դիվանագետը: Նա նաև հույս հայտնեց, որ ներկայիս մրցույթի մասնակիցները ապագայում կարևոր օղակ կդառնան Չինաստանի և Հայաստանի միջև բարեկամական հարաբերությունների ամրապնդման և զարգացման գործում:
Միջոցառմանը ներկա էր ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը: Նա նշեց, որ այս մրցույթը հիանալի առիթ է կրթության, գիտության և երիտասարդական քաղաքականության ոլորտներում կապերի խորացման համար: Փոխնախարարն ընդգծեց նաև երկու երկրների դասական և ժամանակակից գրականության փոխադարձ թարգմանության կարևորությունը՝ ժողովուրդների մերձեցման համար:
Արթուր Մարտիրոսյանը տեղեկացրեց, որ 2026 թվականին Չինաստանում կանցկացվեն Հայաստանի մշակույթի օրերը, ինչը կարևոր քայլ կլինի հումանիտար գործակցության զարգացման գործում: Նա հավելեց, որ 2025 թվականի օգոստոսին Երևանի և Պեկինի միջև պաշտոնապես հաստատված ռազմավարական գործընկերությունը նպաստում է ենթակառուցվածքների, առևտրի և մշակույթի ոլորտներում փոխգործակցության կայուն աճին: Ամփոփելով իր ելույթը՝ փոխնախարարը վերահաստատեց գերատեսչության պատրաստակամությունը՝ այսուհետ ևս ընդլայնելու հայ-չինական կապերը:
News.am
