Հայաստանում հունիսի 6–ին պատանի երաժիշտների դասական «Եվրատեսիլ–2026» 22–րդ մրցույթի անցկացման համար կհատկացվի 665 մլն դրամ։ Այդ մասին կառավարության նիստի ժամանակ ասաց ՀՀ ԿԳՄՍ նախարար Ժաննա Անդրեասյանը։ Ի դեպ, ՀՀ կառավարության այսօրվա նիստը վարում է ՀՀ փոխվարչապետ Մհեր Գրիգորյանը. վարչապետ Նիկոլ Փաշինյանն արձակուրդի մեջ է և մասնակցում է նախընտրական քարոզարշավին։
Անդրեասյանը նշեց, որ հունիսի 6–ը պատահական չի ընտրվել` այդ օրը ծնվել է աշխարհահռչակ հայ կոմպոզիտոր Արամ Խաչատրյանը։ Միջոցառումը կանցկացվի Օպերայի և բալետի ազգային թատրոնում, որի հիմնադրման 100–ամյակը լրանում է այս տարի։
Նախարարը տեղեկացրեց, որ միջոցառումը կանցկացվի ոչ միայն շենքի ներսում, այլև դրսում` հատկապես տանիքային հատվածներում, որտեղ բեմադրվելու են բալետային և այլ ներկայացումներ։
Մրցույթին մասնակցելու է 11 երկիր։ Մեր երկրի մասնակիցը լինելու է 15–ամյա ֆլեյտահարուհի Էլեն Վիրաբյանը։ «Սա մեծ տեսանելիություն կապահովի մեր երկրի համար»,– վստահեցրեց Անդրեասյանը։
Ի դեպ, հունիսի 6–ը նաև ՀՀ խորհրդարանական ընտրություններին նախորդող օրն է, որը համարվում է լռության օր, երբ պաշտոնական քարոզարշավն արգելվում է։
Sputnik Արմենիա
