«Բարգավաճ Հայաստան», «Միասնության Թևեր» կուսակցություններն ու «Հայաստան» դաշինքն այսօր դիմումներ կներկայացնեն ՍԴ՝ պահանջելով անվավեր ճանաչել ընտրությունների արդյունքները։ Այս պահին ՍԴ արդեն ներկայացվել է դիմում՝ «Ուժեղ Հայաստան» կուսակցությունների դաշինքի կողմից՝ ընտրությունների անվավեր ճանաչման պահանջով։ Միասնության թևեր կուսակցությունը դիմումը կներկայացնի ժամը 15։30-ին, ԲՀԿ-ն՝ 16։30-ին, Հայաստան դաշինքը՝ ժամը 17։00-ին։
Նշենք, որ Սահմանադրական դատարանը դիմումը մուտքագրվելուց հետո երկօրյա ժամկետում աշխատակարգային նիստում որոշում է դիմումի ընդունելիության հարցը:
Դիմումը վարույթ ընդունվելու դեպքում նշանակվում է զեկուցող դատավոր, որը գործը նախապատրաստում է դատաքննության: Ազգային ժողովի ընտրությունների արդյունքների վերաբերյալ վեճերով դատաքննությունն իրականացվում է բանավոր ընթացակարգով: Սահմանադրական դատարանը պարտավոր է գործը քննել և որոշում ընդունել դիմումի մուտքագրման օրվանից ոչ ուշ, քան 15 օր հետո։
«ՓաստԻնֆո»
