Մինչ շարունակվում են Իրանի հանգուցյալ առաջնորդի հրաժեշտի արարողությունների նախապատրաստական աշխատանքները, հաղորդվում է, որ Թեհրանում, Ղոմում, Մաշհադում և Իրաքի մի շարք քաղաքներում մի քանի օր տևող միջոցառումներին կմասնակցեն տարածաշրջանի տարբեր երկրների բարձրաստիճան պաշտոնյաներ և պատվիրակություններ, հայտնում է WANA-ն։
Հրապարակված տեղեկությունների համաձայն՝ Ադրբեջանի նախագահ Իլհամ Ալիևը կմեկնի Իրան՝ մասնակցելու սգո արարողությանը։ Ըստ առկա տվյալների՝ նա տարածաշրջանի առաջին առաջնորդներից է, ով հայտարարել է միջոցառումներին ներկա գտնվելու մտադրության մասին։
Սպասվում է նաև, որ հաջորդ շաբաթ բարձրաստիճան պատվիրակության գլխավորությամբ Թեհրան կժամանի Թուրքմենստանի նախագահ Գուրբանգուլի Բերդիմուհամեդովը։ Հաղորդվում է, որ Վրաստանի նախագահ Միխեիլ Կավելաշվիլին նույնպես կմասնակցի հրաժեշտի և հուղարկավորության արարողություններին՝ գլխավորելով իր երկրի պաշտոնական պատվիրակությունը։
Հայաստանի վարչապետ Նիկոլ Փաշինյանը նույնպես մտադիր է այցելել Իրան՝ սգո միջոցառումներին մասնակցելու համար։ Հաղորդվում է, որ Կատարի պատվիրակությունը, ամենայն հավանականությամբ, կգլխավորի երկրի էմիրը։ Եթե նրա ծրագրերը փոխվեն, պատվիրակությունը կգլխավորի Կատարի վարչապետը։
Հարավային Ասիայից Պակիստանի վարչապետը բարձրաստիճան պատվիրակության ուղեկցությամբ Իրան կժամանի ուրբաթ օրը՝ հուլիսի 3-ին։ Ավելի վաղ նա Պակիստանի Ազգային ասամբլեային հայտնել էր, որ այցը տեղի կունենա Իրանի նախագահ Մասուդ Փեզեշքիանի պաշտոնական հրավերով՝ հուղարկավորության միջոցառումներին մասնակցելու նպատակով։
Առկա տեղեկատվության համաձայն՝ Իրանի նախագահ Մասուդ Փեզեշքիանը սգո միջոցառումների ծրագրի շրջանակներում նույնպես կմեկնի Իրաք։ Ըստ պլանի՝ Թեհրանում և Ղումում կայանալիք արարողություններից հետո հանգուցյալ առաջնորդի մարմինը կտեղափոխվի Իրաքի չորս քաղաքներ, իսկ այնուհետև կվերադարձվի Մաշհադ՝ վերջնական հուղարկավորության համար։ Այս կապակցությամբ հաղորդվում է, որ որոշ օտարերկրյա պաշտոնյաներ և ուխտավորներ, ովքեր ի սկզբանե ծրագրում էին մասնակցել Իրանում կայանալիք արարողություններին, որոշել են միանալ Իրաքում անցկացվելիք միջոցառումներին։
Իրանի առաջին փոխնախագահը հայտարարել է, որ օտարերկրյա բարձրաստիճան հյուրերն ու պաշտոնական պատվիրակությունները կսկսեն ժամանել արդեն ուրբաթ օրը։ Նրա խոսքով՝ ձեռնարկվել են բոլոր անհրաժեշտ միջոցները նրանց ընդունելության, արարողություններին մասնակցության ապահովման և իրանցի պաշտոնյաների հետ երկկողմ հանդիպումների կազմակերպման համար։
Պաշտոնական ծրագրի համաձայն՝ հրաժեշտի քաղաքացիական արարողությունը կսկսվի հուլիսի 4-ին՝ առավոտյան ժամը 06:00-ին, Թեհրանի Իմամ Խոմեյնիի անվան մուսալլա մզկիթում և կտևի մինչև հուլիսի 5-ի ժամը 20:00-ն։ Հոգեհանգստյան աղոթքը տեղի կունենա հուլիսի 5-ի առավոտյան։ Թեհրանում, Ղումում և Իրաքում կայանալիք արարողություններից հետո հանգուցյալ առաջնորդը կհուղարկավորվի Մաշհադում (հինգշաբթի օրը՝ հուլիսի 9-ին)։
News.am
