«Բարգավաճ Հայաստան» կուսակցության առաջնորդ Գագիկ Ծառուկյանի դեմ նոր քրեական գործը, որի շրջանակում Քննչական կոմիտեն ավելի վաղ հրապարակել էր մեղադրանքի երեք դրվագ, բացահայտ քաղաքական հետապնդման ակտ է։ Այս մասին հուլիսի 7-ին լրագրողների հետ զրույցում հայտարարել է «Հայաստան» դաշինքի անդամ, ՀՅԴ Դաշնակցության Գերագույն մարմնի ներկայացուցիչ Իշխան Սաղաթելյանը։
«Սա քաղաքական վրեժխնդրության ուղիղ շղթա է, և կարծում եմ՝ դա բոլորի համար ակնհայտ է։ Մարդկանցից, քաղաքական ուժից գողացել են մանդատներ, գողացել են 60 հազար ձայն, իսկ հիմա փորձում են այս ճանապարհով հետապնդել, սահմանափակել, ըստ էության, նրա գործունեությունը։ Նիկոլ Փաշինյանն այս ճանապարհով ձգտում է երկրում հաստատել մեկ անձի բռնապետություն, մեկ մարդու իշխանություն՝ շատ լավ գիտակցելով, որ ինքը զուր է այս պահին գտնվում իր տեղում», – ընդգծել է Սաղաթելյանը։
Նրա խոսքով՝ նման քրեական հետապնդումների նպատակը պետության ներսում դիմադրության ցանկացած օջախ ոչնչացնելու փորձն է, որպեսզի իշխող թիմը կարողանա անարգել կատարել իր արտասահմանյան գործընկերներին տված խոստումները։ Նա նաև կանխատեսել է բռնաճնշումների մասշտաբների ընդլայնում՝ նշելով, որ հարվածի տակ կհայտնվեն ներկա կուրսի հետ անհամաձայն բոլոր անձինք, այդ թվում՝ գործարարները։ «Վերջին յոթ-ութ տարիներին սա արդեն տեղի է ունեցել, և այն, ինչ կատարվում է հիմա, առնվազն մեզ համար նորություն չէ։ Հայաստանում կհետապնդվի ազգային մտածողություն ունեցող ցանկացած մարդ, ով չի սպասարկում թուրք-ադրբեջանական օրակարգը», – եզրափակել է Իշխան Սաղաթելյանը։
News.am
