Պողոսյանը` Փաշինյանի գրառման մասին․ «Որևէ հայ չպետք է այլ հայի «հախից» գալու կոչ անի»

«Մարդկային զարգացման միջազգային կենտրոն» ՀԿ նախագահ Թևան Պողոսյանը կարծում է, որ ՀՀ վարչապետ Նիկոլ Փաշինյանը պետք է հեռանա:

«Երբեք որևէ հայ չպետք է կոչ անի այլ հայի «հախից» գալու։ Եթե նույնիսկ մի օր հիմնավորեք որևէ աստվածային ուժի ներքո, որ նոյեմբերի 9-10-ի ստորագրությանը այլընտրանք չկար ու դա միակ ելքն էր, ապա հայը հայի դեմ գնալու կոչը աներկբա ապացույց է, որ ազգային դավաճանությունը դարձվել է գործելաոճ։ Հեռացեք, ու այդ քայլը թող լինի առաջինը դեպի ազգային միասնականություն»,–Facebook սոցցանցի իր էջում գրել է Պողոսյանը։

Նա նաև մի քանի դիտարկումն է արել ստեղծված իրավիճակի շուրջ` ասելով, որ Արցախը ոչ մեկի գրպանում դրված չէ, որ վերցնեն ու նրանից ինչ-որ մի բան զիջեն, տան, փոխանակեն: Պողոսյանի խոսքով` եթե որևէ բան լինի, կլինի միայն պատերազմով, իսկ այդտեղ մեղադրել կարող ենք միայն մեզ, որ չկարողացանք լավ կռվել ու նորից հաղթել:

Պողոսյանը նկատել է`տարբեր երկրների նախագահներ, վարչապետներ, ԱԳ նախարարներ, դեսպաններ, միջնորդներ կգան ու կգնան։ Զանազան առաջարկներ կանեն ու միշտ իրենց երկրների շահերից ելնելով: Պողոսյանը նշում է` մեր նպատակն է, որ մենք մնանք ու չգնանք. իրենք իրենցն են ցանկանում, մենք մերը պետք է առաջ տանենք:

Բացի այդ, ըստ Պողոսյանի, հողեր պահելով՝ միշտ կբանակցենք անվախ, հանձնելուց հետո բանակցելու ենք վախից դրդված: Նա հավելել է, որ պատերազմը չի ավարտվել ո՛չ առաջնագծում, ո՛չ միջազգային հարթակներում, ու թե ով և ինչի համար պետք է մեզ թիրախավորի, այլևս կարևոր չէ այնքանով, ինչքանով որ մենք պետք է պատրաստ լինենք այսօրվա թշնամիներին հաղթելուն, տեղեկացնում է Sputnik Armenia-ն: