AFP. ՖՐԱՆՍԻԱՆ ԱՄԲՈՂՋ ՈՒԺՈՎ ՓՈՐՁՈՒՄ Է ՊԱՀՊԱՆԵԼ ԱԶԴԵՑՈՒԹՅՈՒՆԸ ՂԱՐԱԲԱՂՅԱՆ ՀԱՐՑՈՒՄ

Ֆրանսիայի նախագահ Էմանուել Մակրոնը կանգնած է լուրջ երկընտրանքի առջև՝ Ֆրանսիայի ազդեցությունը ղարաբաղյան հակամարտության կարգավորման հարցում պահպանելու խնդիրը՝ հաշվի առնելով մեծաթիվ հայ համայնքը երկրում և կանխակալության մեջ Ադրբեջանի մեղադրանքները, գրում է AFP-ը:

Մակրոնը մտահոգություն է հայտնել այս ամիս Ռուսաստանի միջնորդությամբ ստորագրված հրադադարի համաձայնագրի կապակցությամբ, որով վերջ էր տրվել շաբաթներ շարունակվող ռազմական գործողություններին Հայաստանի ու Ադրբեջանի միջև, և թույլ տվել Բաքվին զգալի չափով ամրապնդել ռազմական հաջողությունները:

Ֆրանսիան, Ռուսաստանն ու ԱՄՆ-ը ԵԱՀԿ Մինսկի խմբի համանախագահներն են, որոնք շուրջ 30 տարվա ընթացքում աշխատել են Լեռնային Ղարաբաղի խնդրի կարգավորման ուղղությամբ:

«Մենք չենք համարում այդ հրադադարը բավարար»,-ասել է Մակրոնը ֆրանսահայերի հետ հանդիպման ժամանակ: «Դա չի լուծում քաղաքական և այլ հարցեր»,-հավելել է նա:

Մակրոնը բացահայտ քննադատել է սեպտեմբերի վերջում Բաքվի սկսած ռազմական հարձակումը, և մասնավորապես, ՆԱՏՕ-ի անդամ Թուրքիային մեղադրել է Սիրիայից ջիհադիստներ ուղարկելու մեջ: Նա պնդում էր, որ խնդրի լուծումը չպետք է թողնել Ռուսաստանի և Թուրքիայի հայեցողությանը, որոնք նպաստել են հրադադարին և ցանկանում են տեղակայել իրենց զորքերն Ադրբեջանում՝ հայտարարելով, որ հարցը պետք է լուծվի Մինսկի խմբի կողմից: «Կան մի շարք հարցեր, որոնք չի կարելի լուծել զուտ ռուս-թուրքական երկխոսության շրջանակում»,-ասել է Մակրոնը:

Սակայն երբ Երևանը ռազմական պարտություն էր տարել, իսկ վարչապետ Նիկոլ Փաշինյանը ստիպված էր ստորագրել Ռուսաստանի նախագահ Պուտինի հսկողությամբ ոչ շահավետ հայտարարությունը, Ֆրանսիան բախվել էր բացասական արձագանքի հետ:

Չնայած Փարիզը պնդում էր, որ չեզոք է, ավելի հաճախ են հնչում կոչեր Մինսկի խմբում իր դիրքից հրաժարվելու մասին, ինչը ծայրահեղ տհաճ առաջարկ է, քանի որ Ֆրանսիան ձգտում է ամրապնդել իր միջազային հեղինակությունը:

«Միսնկի խումբն այն տեսքով, որով ստեղծվել է, մեռած է: Վլադիմիր Պուտինը հմտորեն է խաղացել, և թուրքերը նույնպես շահել են»,-ասել է Ֆրանսիայի միջազգային և ռազմավարական հարաբերությունների ինստիտուտի տնօրեն Դիդյե Բիլիոնը:

Ֆրանսիայում ապրում է շուրջ 600 000 հայ, որոնք լավ ներկայացված են քաղաքականության բարձր էշելոններում:

Ֆրանսիայի ԱԳՆ-ի հայտարարության մեջ ընդգծված է, որ Սենատի կողմից Ղարաբաղի ճանաչումը չի արտացոլում Փարիզի քաղաքականությունը: Սակայն Բաքուն կանչել է Ֆրանսիայի դեսպանին, իսկ ադրբեջանցի պատգամավորներն ընդունել են Փարիզը Միսնկի խմբից բացառելու բանաձև:

Որոշ վերլուծաբաններ ենթադրում են, որ օգտակար կլիներ, եթե Ֆրանսիան հրաժարվեր իր դերից՝ հաշվի առնելով իր բարդ հարաբերություններն Ադրբեջանի դաշնակից Թուրքիայի հետ:

Ներկայում Ֆրանսիան փորձում է կիրառել փափուկ ուժ՝ Հայաստանին օգնություն ուղարկելով:

Վերլուծաբանները համարում են, որ քանի դեռ հրադադարի ռեժիմը պահպանվում է, դա չի լուծում Լեռնային Ղարաբաղի երկարաժամկետ կարգավիճակի հարցը: Գործարքն անվանելով «Հայաստանի համար դառը հաբ»՝ Միջազգային ճգնաժամային խմբի վերլուծաբանները հայտարարել են. «Նվաստացումը չի կարող ամուր հիմք լինել կայուն խաղաղության համար»:

News.am