Արթուր Ղազինյան. Այս պատերազմում խորհրդանշական համընկնումներ շատ են

Այս պատերազմում խորհրդանշական համընկնումներ շատ են: Այդ մասին ֆեյսբուքյան իր էջում գրել է «Մեկ Հայաստան» կուսակցության նախագահ Արթուր Ղազինյանը՝ ավելացնելով, որ Ադրբեջանի դրոշի օրը հանձնվեց Շուշին, ազգային հերոս Մոնթեի ծննդյան օրն առանց մարտերի Ադրբեջանին հանձնվեց Քարվաճառը:

«Վստահ եմ՝ կան շատ այլ խորհրդանշական նախօրոք ծրագրավորված ստորացումներ, որոնց լուռ համաձայնվել ու ենթարկվել է Նիկոլը: Կարող էր չէ՞ մեկ օր հետո կամ առաջ հանձնել Շուշին կամ Քարվաճառը: Բայց ո՛չ, նա պետք է նվիրեր մեր հայրենիքը հենց այն օրը, երբ կհրամայեր Ալիևը», - գրել է Ղազինյանը:

Նա նշել է նաև, իր ձևակերպմամբ՝ հերթական խորհրդանշական ստորացումը:

Այսպես, 1991 թվականի դեկտեմբերի 10-ին միջազգային դիտորդների ներկայությամբ անցկացված համաժողովրդական հանրաքվեն միահամուռ հաստատեց ԼՂՀ ազգաբնակչության կամքը` անկախության հռչակման վերաբերյալ: Իսկ 2020թ. դեկտեմբերի 10-ին բաքվում տեղի է ունենում Հայաստանի և Արցախի նկատմամբ տարած հաղթանակի զորահանդես՝ հատուկ ցուցադրելով մեր զինվորական տեխնիկան:

«Ադրբեջանում իրենց հաղթանակի համար պետք է երախտապարտ լինեն միայն Նիկոլ Փաշինյանին և նրա դավաճանների թիմին: Առանց ներքին դավաճանության այս պատերազմն ադրբեջանը չէր կարող հաղթել, նրանք լավ գիտեին հայկական զինված ուժերի հարվածի ցավն ու ծանրությունը: Այս օրը Հայաստանի պատմության մեջ կմնա որպես «ժողովրդի» խայտառակության օր», - գրել է կուսակցության նախագահը, տեղեկացնում է Aysor.am-ը: