Հայտնի է Թուրքիային Bayraktar-TB2-ի բրիտանական բաղադրիչների մատակարարման դադարեցման պատճառը

Հայտնի է դարձել Մեծ Բրիտանիայից Թուրքիա անօդաչու թռչող սարքերի արտադրության համար նախատեսված բաղադրիչ մասերի մատակարարումների դադարեցման մասին: Խոսքը Andair Ltd-ի մասին է, որը բաղադրիչներ է մատակարարել թուրքական Baykar Makina արտադրողին, որը թողարկում է Bayraktar-TB2 հարվածային հետախուզական անօդաչու թռչող սարքեր:

Ըստ արևմտյան մամուլի՝ արտահանումը դադարեցվել է այն պատճառով, որ Թուրքիան Ադրբեջանին բրիտանական բաղադրիչներով անօդաչու թռչող սարքեր էր վաճառում Լեռնային Ղարաբաղի պատերազմում դրանց հետագա օգտագործման համար:

Հայկական տեղեկատվական աղբյուրները գրում են, որ բրիտանական ընկերությունը դիմել է Լոնդոնում Հայաստանի դեսպանատուն` խնդրելով պարզաբանել, թե արդյոք Ղարաբաղում հակամարտության ընթացքում խփված Bayraktar-ը բրիտանական նշագրմամբ մասեր ունի: Հայկական կողմը հաստատել է տեղեկատվությունը՝ անօդաչու սարքերի վրա Andair Ltd-ի վառելիքի պոմպերի առկայության մասին:

Նշենք, որ Ղարաբաղում խփված «Բայրաքթարներում» բրիտանական բաղադրիչների առկայության մասին տեղեկատվությունը մամուլ էր դուրս եկել դեռ նոյեմբերին: Միևնույն ժամանակ, բրիտանական ընկերությունը քննադատության է ենթարկվել Թուրքիայի հետ համագործակցության համար, որը «պատրաստ է ՄԱԿ-ի Անվտանգության խորհրդի կողմից չսահմանված ռազմական գործողությունների համար ԱԹՍ-ի վաճառքը երրորդ երկրներին»: Հենց այս ձևակերպումն է, որն այժմ օգտագործվում է որպես թուրքական անօդաչու սարքերի արտադրության մատակարարումների դադարեցման պատճառ:

Այս առումով կարելի է ենթադրել, որ բրիտանական ընկերությունը ի սկզբանե քաջատեղյակ էր Ադրբեջանի կողմից օգտագործվող թուրքական արտադրության անօդաչու թռչող սարքերի վրա իր բաղադրիչների առկայության մասին: Եվ միայն հասարակության ուշադրությունն այս խնդրին Լեռնային Ղարաբաղում մի քանի այդպիսի անօդաչու ինքնաթիռներ խփելուց և դրանց «ներսից» զննելուց հետո, Andair Ltd.-ին ստիպել է դադարեցնել համագործակցությունը թուրքական Baykar Makina-ի հետ, տեղեկացնում է Aysor.am-ը: