Դատախազությունն ուսումնասիրում է ապստամբության վերաբերյալ Վազգեն Մանուկյանի հայտարարությունները

ՀՀ գլխավոր դատախազությունն ուսումնասիրում է «Հայրենիքի փրկության շարժման» վարչապետի թեկնածու Վազգեն Մանուկյանի հայտարարությունները՝ ապստամբության և պատերազմի ընթացքում գեներալներին զանգելու վերաբերյալ։ ՀՀ դատախազության Հանրային կապերի բաժնի պետ Արևիկ Խաչատրյանը «Փաստինֆո»-ի հարցին ի պատասխան նշեց, որ դատախազության կողմից մոնիթորինգի արդյունքում այդ հայտարարությունների վերաբերյալ ԶԼՄ հրապարակումներն արձանագրվել են և այժմ դատախազությունն ուսումնասիրություն է իրականացնում այդ կապակցությամբ։ Հետագա ընթացքի, արդյունքների մասին լրացուցիչ տեղեկություն կտրամադրվի։

Հիշեցնենք, որ երեկ Արարատի մարզում Վազգեն Մանուկյանը հայտարարել էր, որ եթե ՀՀ գործող իշխանությանը հեռացնելու սահմանադրական ճանապարհն արդյունք չտա, կգնան ապստամբության, քանի որ սա մեր ժողովրդի, երկրի ապագայի հարցն է։ Մանուկյանը նշել էր, որ եթե կառավարությունը չի կարողանում կատարել իր պարտականությունները, ապա ժողովուրդն իրավունք ունի ապստամբության։ Իսկ թե ինչ նկատի ապստամբություն ասելով՝ Մանուկյանը պարզաբանել է, որ դրա տակ հասկանում է շենքեր գրավելը և զոռով հեռացնել՝ առանց ֆիզիկական բռնության։ Մանուկյանը նաև նշել է, որ պատերազմի ընթացքում հոդված է գրել՝ առաջարկելով, որ զինվորականությունն իր ձեռքը վերցնի իշխանությունը։ Ավելին՝ նա նաև հայտարարել է, որ պատերազմի ընթացքում միշտ հեռախոսի միջոցով կապվում էր Արցախի հետ, գեներալների հետ, ասում, որ վերջիններս վերցնեն իրենց ձեռքն իշխանությունը և թույլ չտան, որ Արայիկ Հարությունյանը Փաշինյանի հրամանները կատարի և Արցախը կորցնի իր ինքնուրույնությունը։