«Բարգավաճ Հայաստան». Իշխանության դեմ պայքարը կվերսկսվի նոր ուժով

Քաղաքական գործիչների շրջանում ես առաջիններից էի, ով հայտարարեց, որ ՀՀ վարչապետ Նիկոլ Փաշինյանը չի պատրաստվում հրաժարական տալ՝ չնայած նրան, որ իշխանությունը փորձում էր հակառակը համոզել և՛ հասարակությանը, և՛ ընդդիմությանը: Այս մասին News.am-ի հետ զրույցում ասաց «Բարգավաճ Հայաստան» կուսակցության պատգամավոր Նաիրա Զոհրաբյանը՝ մեկնաբանելով «Իմ քայլի» պատգամավորների և Նիկոլ Փաշինյանի երեկվա հանդիպումը:

Զոհրաբյանը հիշեցրեց, որ Փաշինյանը փորձում էր խորհրդարանական ընդդիմության հետ համաձայնության գալ՝ առաջարկելով համատեղ հուշագիր, որը դիտարկում էր նրա հրաժարականը, սակայն միայն թեկնածու առաջադրելու հրաժարավելու հաշվին: «Ինչպես հայտնի է, մեր կուսակցության ղեկավար Գագիկ Ծառուկյանը կտրականապես հրաժարվել է տվյալ առաջարկից, և այդ մասին հայտարարել է նույնիսկ ինքը՝ Փաշինյանը, խորհրդարանում ելույթի ժամանակ»,-նկատեց պատգամավորը:

Պատգամավորը նշեց, որ գործող իշխանությունը փորձել է անհեթեթ թեզ առաջ տանել այն մասին, որ իրենք կարող են լուծարել խորհրդարանը, սակայն վարչապետը կմնա իշխանության ղեկին և կշարունակի ղեկավարել երկիրը: «Սակայն նրանք հասկացան, որ դա խնդրահարույց է, քանի որ Եվրոպայի Խորհրդի Վենետիկի հանձնաժողովը և միջազգային կառույցները դեմ հանդես կգան տվյալ նախաձեռնությանը»,-ասաց պատգամավորը՝ հավելելով, որ դրա հետ մեկտեղ Փաշինյանի թիմը մոնիթորինգ է անցկացրել երկրի մարզերում և իր համար չմխիթարող եզրակացություններ արել:

Նաիրա Զոհրաբյանի խոսքով՝ իշխանությունը համոզվել է, որ ցանկալի աջակցության չի կարող հասնել ո՛չ մարզերում, ո՛չ Երևանում, և նաև դա էր պատճառը, որ որոշեց հրաժարվել արտահերթ խորհրդարանական ընտրություններ անցկացնելուց:

Նաիրա Զոհրաբյանն անդրադարձավ նաև ընդդիմության պասիվության թեմային: Նա համաձայնեց, որ Ամանորից հետո փոքր-ինչ նվազել է ընդդիմության ակտիվությունը, սակայն վստահեցրեց, որ գործող իշխանության դեմ պայքարը եղանակային պայմանների լավացումից և մարդկանց՝ խորը շոկից դուրս գալուց հետո կվերսկսվի նոր ուժով: Նա պարզաբանեց, որ ցուրտ եղանակին դժվար էր մարդկանց համոզել՝ փողոց դուրս գալ և միանալ պայքարին: Բացի այդ, նրա կարծիքով, մարդիկ դեռ ուշքի չեն եղել ծանր հարվածից հետո, որը հասցրեց պատերազմը:

Հիշեցնենք, որ երեկ «Իմ քայլի» պատգամավորները հանդիպել են Նիկոլ Փաշինյանի հետ: Հանդիպման արդյունքներով հաղորդագրություն է տարածվել, որում խորհրդարանական մեծամասնությունը նշել է, որ «արտահերթ խորհրդարանական ընտրություններ անցկացնելու վարչապետի առաջարկը դրական արձագանք չի ստացել խորհրդարանական ընդդիմության կողմից, բնակչության լայն շերտերի շրջանում արտահերթ ընտրություններ անցկացնելու հասարակական պատվեր չկա»: