Զոհրաբյան․ Իշխանությունների կողմից վարչական ռեսուրսների կիրառման կապակցությամբ կդիմեմ իրավապահներին

Ստացվող հաղորդումների, այդ թվում` ԶԼՄ-ներում տեղ գտած հրապարակումների, մարդկանց` իշխանության հանրահավաքին բերելու նպատակով վարչական ռեսուրսների բարբարոսական կիրառման բազմաթիվ դեպքերի կապակցությամբ ես կդիմեմ Գլխավոր դատախազություն և Ոստիկանություն: Այս մասին մարտի 2-ին խորհրդարանում լրագրողների հետ զրույցում ասաց «Բարգավաճ Հայաստան» կուսակցության պատգամավոր Նաիրա Զոհրաբյանը:

Նա պարզաբանեց, որ ԶԼՄ-ները գրում են մարդկանց կաշառք բաժանելու դեպքերի մասին` հավելելով, որ իրեն անձամբ զանգահարել է Սյունիքի մարզպերատանի աշխատակցուհին և հայտնել, որ իրենց ստիպում են գալ հանրահավքաին և մարդ բերել իրենց հետ, սակայն մայրաքաղաք հասած քաղաքացիները միացել են ընդդիմության հանրահավաքին: «Ես շատ ազդանշաններ եմ ստանում այն ​​մասին, որ մարզերից մարդկանց հանրահավաքի են բերել աշխատանքից հեռացման սպառնալիքով: Հրապարակ են բերել դպրոցների տնօրեններին, պետական ​​գերատեսչությունների, տեղական իշխանությունների և նույնիսկ հոգեբուժարանների աշխատակիցներին: Մարդկանց փաստացի բերման են ենթարկել` շոու և երեկույթ անցկացնելու համար»,- ասաց Զոհրաբյանը:

Պատգամավորը մի դեպք պատմեց, երբ Ստեփանավանում անապահով քաղաքացիներին կոչ են արել կա՛մ փակել նրանց պարտքերը խանութում, կա՛մ միանալ Փաշինյանի հանրահավաքին, որպեսզի հետագայում հնարավոր պարտքով սնունդ վերցնել: «Փաշինյանը, ով իր ողջ կարիերայի ընթացքում բարձրաձայնում էր վարչական ռեսուրսների օգտագործման խնդրի մասին, դիմում է դրան անասելի մասշտաբներով: «Իմ քայլը» դաշինքի խմբակցությունը լքած Սոֆյա Հովսեփյանն ինքն է խոստովանել, որ այժմ համատարած է այն, ինչի դեմ իրենք պայքարում էին»,- եզրափակեց Նաիրա Զոհրաբյանը, տեղեկացնում է News.am-ը: