Սերգեյ Շոյգու. Լեռնային Ղարաբաղը յուրատեսակ շատ բարդ գործողություն է

Լեռնային Ղարաբաղը յուրատեսակ շատ բարդ գործողություն է: Այս մասին ասել է Ռուսաստանի պաշտպանության նախարար Սերգեյ Շոյգուն ղազախական Tengrinews գործակալության հետ հարցազրույցում:

Խոսելով Ռուսաստանի և Թուրքիայի հարաբերությունների մասին՝ նա նշել է, որ «մեզ մոտ ընթանում է շատ դժվար, շատ բարդ, բայց շատ կառուցողական աշխատանք»: «Համատեղ աշխատանք: Այն պատճառով է բարդ, որ խանգարում են, խանգարում է այն, որ Թուրքիան ՆԱՏՕ-ի անդամ է... Բայց մենք գտնում ենք լուծման տարբերակներ: Օրինակ՝ Իդլիբի ապաէսկալացիայի գոտին: Ընդհանրապես ժամանակին Սիրիայում ապաէսկալացիայի գոտիների ստեղծումը, մեր կարծիքով, այդ կարգի հակամարտությունների կարգավորման նոր էջ է և նոր մեխանիզմ... Վերջին աշխատանքն, անկասկած, Լեռնային Ղարաբաղն է: Դա յուրատեսակ շատ բարդ գործողություն է: Ես հենց այդպես կցանկանայի այն անվանել, ոչ այլ կերպ: Որովհետև դրա մեջ ընդգրկված էին ահռելի թվով փաստարկներ, տարրեր, մոտիվներ: Քանի որ, համաձայնվեք, երբ թշնամանում են երկու եղբայրական ժողովուրդներ, մեզ մտերիմ երկու հարևաններ, նրանք, ում հետ ապրել ենք, կրկնվեմ ևս մեկ անգամ, հետագայում էլ ապրելու ենք խաղաղությամբ, համաձայնությամբ և բարեկամությամբ...

Մյուս կողմից՝ դրան Թուրքիայի միանալու հանգամանքը, ուստի անհրաժեշտ էր խոսել և զբաղվել նաև թուրք գործընկերների հետ: Մեր նախագահը, հավատացեք ինձ, տիտանական ջանքեր է ներդրել, որպեսզի այս ամենը տեղի ունենա: Ընդ որում՝ ստիպված էր համոզել բոլորին: Այսինքն՝ չկար մեկը, ով կասեր. «Ես համաձայն եմ, միայն նրանց համոզեք»: Ո՛չ, ստիպված էինք համոզել, անկասկած, բոլորին: Նաև մենք՝ գործընկերների կամ պաշտպանության նախարարների մեր մակարդակում, մենք խոսել ենք նաև մեր թուրք գործընկերների հետ: Այն, ինչ այսօր արվել է, առաջին՝ մարդիկ դադարել են միմյանց սպանել: Երկրորդ՝ հույս ունեմ, որ հիմա ժամանակն է, որ նրանք արդեն անցնեն երկկողմ շփումների և իրար հետ խոսեն, սկսեն խոսել: Ես նկատի ունեմ Հայաստանն ու Ադրբեջանը:

Եվ այստեղ, իհարկե, շատ բան կախված է Թուրքիայի հետ Ռուսաստանի հարաբերություններից: Նաև նոր խաղացողներ են հայտնվում, հին հարևաններն են հայտնվում, բայց նրանք հայտնվում են իրենց առաջարկներով: Ես նկատի ունեմ Իրանը: Դա ենթակառուցվածքների զարգացումն է, դա նաև երկաթուղին է, դա նաև հիդրոէներգետիկան է և տրանսպորտային հաղորդակցությունը: Հարցերը շատ են»,- ասել է ՌԴ պաշտպանության նախարարը, տեղեկացնում է News.am-ը: