Քոչարյանի և մյուսների գործով դատական նիստը սկսվեց ընդմիջումով

Դատավոր Աննա Դանիբեկյանը Հայաստանի երկրորդ նախագահ Ռոբերտ Քոչարյանի և մյուսների գործով դատական նիստը սկսելուն պես ընդմիջում հայտարարեց՝ պարզելու համար որոշ մասնակիցների բացակայության պատճառը:

Բացակայում էին երկու դատախազները, ըստ որում՝ նրանցից միայն Գևորգ Բաղդասարյանից էր հաղորդագրություն ստացվել այն մասին, որ պատրաստվում է ծավալուն միջնորդություն՝ կապված նախօրեին հրապարակված ՍԴ որոշման հետ, ուստի դատախազը խնդրում է նիստը հետաձգել ապրիլի 6-ին: Պետրոս Պետրոսյանից ոչ մի լուր չէր ստացվել:

Բացակայում էր նաև Սեյրան Օհանյանի փաստաբան Կարեն Մեժլումյանը: Նա եկավ ընդմիջում հայտարարելուց մեկ րոպե անց:

Սա դատարանի առաջին նիստն է Սահմանադրական դատարանի որոշումից հետո, որը ՔՕ 300.1 հոդվածը ճանաչել էր ՀՀ Սահմանադրության 78 և 79 հոդվածներին հակասող: ՍԴ-ն նախօրեին երեկոյան հրապարակել էր որոշման 42 էջանոց ամբողջական տեքստը: Եզրափակիչ մասը ՍԴ-ն հրապարակել էր դեռևս անցած շաբաթվա վերջին: ՍԴ որոշումը վերջնական է, բողոքարկման ենթակա չէ: ՍԴ-ն 300.1 հոդվածը համարում է իրավունքի և մեղսագրվող արարքների տեսակետից անորոշ, պարզ չէ, թե ինչ կարգի տապալման մասին է խոսքը՝ հաշվի առնելով, որ հոդվածը կիրառվել է մի՝ գործող Սահմանադրությամբ, բայց փորձել են կիրառել մյուս Սահմանադրության դեպքում:

Ռոբերտ Քոչարյանը, Յուրի Խաչատուրովը, Սեյրան Օհանյանը և Արմեն Գևորգյանը մեղադրվում են հենց 300.1 հոդվածով՝ սահմանադրական կարգի տապալում: Դատարանը, փաստորեն, նշված ամբաստանյալների, ինչպես նաև այս գործի շրջանակում համանման մեղադրանքով անցնող բոլոր անձանց նկատմամաբ այս հոդվածով քրեական հետապնդումը պետք է դադարեցնի:

Նշենք, որ դատավորը թույլ չտվեց դատավարության մասնակիցների շարքում տեղ զբաղեցնել Սեդրակ Քոչարյանի փաստաբան Մարտիկ Մարտիրոսյանին՝ պատճառաբանելով, որ համապատասխան միջնորդությունը առայժմ չի քննվել, տեղեկացնում է News.am-ը: