Ադրբեջանցիները պետական սահմանն անցել են ու առաջ են եկել

Այս պահի դրությամբ ադրբեջանցիները մի քիչ առաջ են եկել։ Կրակոցներ չեն եղել, բայց որ առաջ են եկել, հաստատ է։ Տեղեկությունը Sputnik Արմենիային հայտնեց Գորիսի փոխքաղաքապետ Մենուա Հովսեփյանը։

«Հիմա զինվորականները բանակցում են, որ հետ գնան»,-ասաց նա։

Գորիսի փոխհամայնքապետ Իրինա Յոլյանն իր հերթին ֆեյսբուքյան էջում նշել է.

«Իշխանասարի հատվածում թշնամին պետական սահմանը անցել է և ևս երեք կիլոմետր առաջ եկել դեպի Վերիշեն բնակավայր ու հարյուրներով շարված են։ Այս պահին բանակցում են։

«Սև լճի տարածքից կիլոմետրերով առաջ են եկել և կանգնել։ Եթե GPS-ով Սև լճի 30տոկոսն էր թշնամունը, սրանք էնքան են իրենց արտոնյալ համարում, որ որոշել են հասնել մինչև բնակավայր ու Շուռնուխի օրինակով առաջ գալ։ Ժողովուրդ, չգիտեմ` էլի ով ինչ կհերքի, բայց լսեք սյունեցիների ահազանգը, բոլորիս վերջը գալու է, եթե շարունակենք այս վտանգավոր անտարբերությունը»,-գրել է Իրինա Յոլյանը։

Հիշեցնենք` լրատվամիջոցներում ու սոցկայքերում լուրեր են տարածվել այն մասին, որ Սյունիքի մարզի Իշխանասարի հատվածում թշնամին մրտական գործողություններ է սկսել, նշվում էր նաև վիրավորների առկայության մասին։

ՀՀ ՊՆ–ում Sputnik Արմենիայի հարցին ի պատասխան այս տեղեկությունները չհաստատեցին։

Սյունիքի մարզպետարանում ևս հայտնեցին, որ նման տեղեկություն չունեն։