ԱՄՆ-ն հավատարիմ է ԼՂՀ հակամարտության երկարաժամկետ քաղաքական կարգավորման նպատակին

ԱՄՆ-ն հավատարիմ է ն Լեռնային Ղարաբաղի հակամարտության երկարաժամկետ քաղաքական կարգավորման խնդրին: Այս մասին, այսօր` մայիսի 22-ին, հայտարարեց Հայաստանում ԱՄՆ գործերի ժամանակավոր հավատարմատար Ռայան Քեմփբելը` բացելով Հայ-ամերիկյան առաջին քաղաքագիտական ֆորումը:

Նրա խոսքով` ԱՄՆ նախագահ Ջո Բայդենի վարչակազմը նշում է անվտանգության կարևորությունն այս տարածաշրջանում: «Այս շաբաթվա սկզբին Ազգային անվտանգության հարցերով խորհրդական Ջեյք Սալիվանը խոսել է վարչապետ Նիկոլ Փաշինյանի հետ և վերահաստատել, որ Միացյալ Նահանգները հավատարիմ են խաղաղության, անվտանգության և բարգավաճման ապահովման սկզբունքներին: ԱՄՆ-ն նաև խորապես հավատարիմ է Լեռնային Ղարաբաղի հակամարտության երկարաժամկետ քաղաքական կարգավորման խնդրին` աշխատելով ինչպես երկկողմ ռեժիմում, այնպես էլ ԵԱՀԿ Մինսկի խմբի համանախագահների հովանու ներքո»,- ասաց նա:

Քեմփբելը նշեց, որ անցած տարին դժվար էր կորոնավիրուսի համավարակի տեսանկյունից: «Համավարակը մարտահրավեր է դարձել համընդհանուր անվտանգության ապահովման համար, որն ազդել է բոլոր պետությունների վրա, բայց, միևնույն ժամանակ, այն միավորել է մեզ և ընդգծել համագործակցության և գործընկերության կարևորությունը»,- ընդգծեց դիվանագետը: Համավարակի բռնկումից հետո ԱՄՆ կառավարությունը 11 միլիոն դոլար է հատկացրել Հայաստանին Covid-19-ի դեմ պայքարի համար, ասաց նա: Այս օգնությունը, հավելեց Քեմբելը, օգնել է ձեռք բերել անհրաժեշտ բժշկական սարքավորումներ, նախապատրաստել համակարգը լաբորատոր հետազոտությունների համար և աջակցել տեխնիկական փորձագետներին՝ արձագանքելու և պատրաստակամություն ցուցաբերելու անհրաժեշտ միջոցներ ձեռնարկելու, ինչպես նաև ծանր դեպքերը մեղմելու համար, տեղեկացնում է News.am-ը: