Գեներալ-լեյտենանտ Վարյանի կոչը

Այսօր մեր ժողովուրդը իշխանության մեջ գտնվող պոպուլիստ պատեհապաշտների անհեռատես գործունեության շնորհիվ կանգնել է քաղաքցիական բախումների շեմին: Ձեր պարտքն է, հարգելի ոստիկաններ, րոպե առաջ կանխել եղբայրասպանությունը և մեր պետականության մնացորդների փոշիացումը: Այս մասին ասավում է նախկին փոխոստիկանապետ ոստիկանության գեներալ-լեյտենանտ Հովհաննես Վարյանի տարածած հայտարարությունում, տեղեկացնում է News.am-ը:

«ԴԻՄՈՒՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՈՍՏԻԿԱՆՈՒԹՅԱՆԸ

Հարգելի ոստիկաններ, երկար ժամանակ է ինչ առանց քաղաքականությամբ զբաղվելու հետևում եմ հասարակական կարգի պաշտպանությանն ու հասարակական անվտանգության ապահովմանն ուղղված ձեր գործունեությանը: Այդ ընթացքում հպարտության և հիասթափության պահերը հաջորդել են միմյանց: Հիասթափության զգացողություններս չափազանցություն չեն. Ցավով պետք է արձանագրեմ, որ վերջին երեք տարում ոստիկանությունը կորցրել է պետական շահի պաշտպանի, անվտանգության երաշխավորի իր բովանդակությունն՝ ավելի ու ավելի վերածվելով քաղաքական իշխանության կցաճուկի, մեկ անձի քմհաճույքներն ու անօրինական որոշումներն սպասարկողի: Այդպես շարունակելը կորստաբեր է անվերադարձ:

Այսօր մեր ժողովուրդը իշխանության մեջ գտնվող պոպուլիստ պատեհապաշտների անհեռատես գործունեության շնորհիվ կանգնել է քաղաքցիական բախումների շեմին: Ձեր պարտքն է, հարգելի ոստիկաններ, րոպե առաջ կանխել եղբայրասպանությունը և մեր պետականության մնացորդների փոշիացումը: Հիշեք՝ Ոստիկանության գործունեության հիմնարար սկզբունքներն են օրինականությունն ու քաղաքական չեզոքությունը: Ոստիկանության կրտսեր խմբի ծառայողներ, սպաներ, դուք պարտավոր չեք կատարելու ապօրինի որևէ հրաման, քաղաքական որևէ պատվեր: Եթե կասկածում եք ձեր անմիջական պետերի տված հրամանների օրինականությանը, առանց կաշկանդվելու զեկուցագրով պահանջեք հրամանների գրավոր հաստատում.

Ձեր այս իրավունքը երաշխավորված է օրենքով: Տուրք չտաք պատեհապաշտությանը, որևէ պարագայում բռնություններ չկիրառեք խաղաղ ընդվզող մեր քաղաքացիների նկատմամբ, ինչ դրսևորումներ էլ որ ունենա անհնազանդությունը. Դա էլ մեր քաղաքացիների անկապտելի իրավունքն է: Ակամայից հանցանք կատարելու գնով չփորձեք ապահովել ձեր հանգիստ պաշտոնավարումը, որովհետև այդ հանգստությունը չի գալու, բայց գալու է պատասխան տալու և քավության նոխազ դառնալու ժամանակը: Հարգելի ոստիկաններ, ես ձեզանից մեկն եմ, ամբողջ կյանքս ծառայել եմ պետությանը՝ շարքայինից գեներալ կոչումներով:

Շատերիդ հետ անցել եմ ծանր, բայց պատվաբեր ճանապարհ, և երևի վաստակել եմ այս դրամատիկ օրերին անկեղծ կոչով ձեզ դիմելու իրավունքը: Եկեք վճռական այս պահին մեկ անգամ ևս սատար կանգնենք մեր վիրավոր պետությանը, առանց օրինականությունից շեղվելու կատարենք մեր պարտքը Հայաստանի Հանրապետության քաղաքացու հանդեպ, միավորվենք և վերականգնենք մեր խոցված ազգային արժանապատվությունը, մեր մասնագիտական հպարտությունը: Կանգնած եմ շարքում, ձեր կողքին՝ ի զորակցություն մեր հայրենիքի վաղվա օրվա և անվտանգության»,- ասված է հայտարարությունում: