Գրիգորյանը` Սյունիքում ադրբեջանական միջանցք ստեղծելու մասին

Հայաստանի ու Ադրբեջանի միջև քննարկվող հաղորդակցությունների ապաշրջափակումը տարածաշրջանում չի ենթադրում ինչ-որ միջանցքի ստեղծում։ Այս մասին hraparak.am-ին տված հարցազրույցում հայտարարել Է ՀՀ փոխվարչապետի պաշտոնակատար Մհեր Գրիգորյանը:

«Ուզում եմ ևս մեկ անգամ վստահեցնել և արձանագրել, որ միջանցքային տրամաբանության հարց ես երբևէ չեմ քննարկել, չեմ քննարկում ու չեմ էլ քննարկելու, դա ուղղակի բացառված է, և էդ կոնտեքստում որևէ բան մեկնաբանելու կարիք ու անհրաժեշտություն չեմ տեսնում, որովհետև չի լինելու նման բան։ Դա հնարավոր չէ ուղղակի, դա բացառված է», – ասել է Գրիգորյանը։

«Միջանցքային տրամաբանություն» բառակապակցությամբ ենթադրվում է կողմերից մեկի կողմից լրացուցիչ սուվերեն իրավունքների տրամադրում։ Սա փոխվարչապետի պաշտոնակատարը բացառում է։

Գրիգորյանը նաև նշել է, որ տարածաշրջանում ուղիների ապաշրջափակման տրամաբանությունը ենթադրում է Ադրբեջանի և այլ երկրների կողմից հայկական տարածքի օգտագործման հնարավորություն բեռների տարանցման և ընդհանուր առևտրաշրջանառության համար։

«Ճանապարհներն էլ ադրբեջանական կողմից որևէ հսկողության չեն ենթարկվելու, ինչպես նաև արտոնյալ կամ որևիցե մի հատուկ կարգավիճակ չեն ունենալու», – վստահեցրել է Գրիգորյանը։

Հարցին, թե արդյո՞ք Սյունիքի տարածքով անցնելու է ճանապարհը, Գրիգորյանը դժվարացել է պատասխանել՝ հավելելով, որ դա կախված է ենթակառուցվածքների վիճակից և արդյունավետությունից:

Մհեր Գրիգորյանը Հայաստանի, Ռուսաստանի և Ադրբեջանի կառավարությունների փոխնախագահների կազմում գործող հաղորդակցությունների ապաշրջափակման եռակողմ աշխատանքային խմբի համանախագահն է: Չնայած ապրիլից հանձնաժողովի աշխատանքը դադարեցվել է, սակայն այսօր տեղեկություն է հայտնվել ռուսաստանցի համանախագահ, փոխվարչապետ Ալեքսեյ Օվերչուկի` Բաքու կատարած այցի մասին:

Նշենք, որ ադրբեջանական իշխանությունները մշտապես պնդում են այսպես կոչված «Զանգեզուրի միջանցքի» մասին։

Ադրբեջանի նախագահը նույնիսկ սպառնացել է, որ եթե Հայաստանը միջանցք չտրամադրի, ապա իրենք պատրաստ են այն ուժով վերցնել, տեղեկացնում է Sputnik Armenia-ն։