Անդրանիկ Քոչարյան․ Թե ՀՀ–ի ու ՌԴ–ի ԶՈՒ–երն ինչ են պայմանավորվել, կդժվարանամ ասել

Թե մեր Զինված ուժերի և Ռուսաստանի Դաշնության ԶՈՒ–երի միջև ինչ պայմանավորվածություններ են հաստատվել, ես կդժվարանամ ասել, բայց կարծում եմ դա ի վնաս ՀՀ–ի երբեք չի կարող լինել։

Այս մասին այսօր՝ օգոստոսի 9–ին, հայտարարեց «Քաղաքացիական պայմանագիր» խմբակցության պատգամավոր Անդրանիկ Քոչարյանը՝ պատասխանելով «Հայաստան» խմբակցության պատգամավոր Աննա Գրիգորյանի հարցին, թե ի՞նչ բանակցությունների մասին է խոսքը և ի՞նչ է դրված բանակցություննեի սեղանին, երբ ՊՆ–ն հուլիսի 28–ին հայտարարեց, որ Մոսկվայում նախատեսվող բանակցություններից առաջ հակառակորդը նախահարձակ մարտական գործողություններ է սկսել Հայաստանի սահմանների վրա՝ Սոթքից մինչև Վերին Շորժա հատվածում։

«Մոսկվայում մեր ռազմավարական գործընկերոջ պաշտպանական գերատեսչության հետ քննարկվել են այդ սահմանային իրավիճակներում հնարավոր զարգացումները կանխելը։ Հիմա այս պահի դրությամբ ուր են հասել և մեր Զինված ուժերի և Ռուսաստանի Դաշնության ԶՈՒ–երի միջև ինչ պայմանավորվածություններ են հաստատվել, ես կդժվարանամ ասել, բայց կարծում եմ դա ի վնաս ՀՀ–ի երբեք չի կարող լինել»,– ասաց Քոչարյանը, տեղեկացնում է News.am-ը։