Սերգեյ Շոյգու. Հայաստանը Ռուսաստանի առանցքային գործընկերն է

Ռուսաստանի ռազմական գերատեսչությունը պատրաստ է աջակցել Հայաստանի Զինված ուժերի արդիականացմանն ու բարեփոխմանը, այսօր ասել է ՌԴ պաշտպանության նախարար, բանակի գեներալ Սերգեյ Շոյգուն ՀՀ պաշտպանության նախարար Արշակ Կարապետյանի հետ Մոսկվայում կայացած հանդիպման ժամանակ:

«Մենք կարևոր նշանակություն ենք տալիս ռազմական ոլորտում համագործակցության զարգացմանը՝ ինչպես երկկողմ ձևաչափով, այնպես էլ՝ ՀԱՊԿ շրջանակում։ Միևնույն ժամանակ, մենք պատրաստ ենք շարունակել աջակցել Հայաստանի Զինված ուժերի բարեփոխումների ծրագրի իրականացմանը»,- ՌԴ ՊՆ մամուլի ծառայության փոխանցմամբ, ասել է Սերգեյ Շոյգուն։

Նա նաև նշել է, որ Հայաստանում գտնվող ՌԴ 102-րդ ռազմաբազան հագեցած է և հանդիսանում է անվտանգության երաշխավոր։

«Հայաստանը Ռուսաստանի դաշնակիցն ու առանցքային գործընկերն է Անդրկովկասում անվտանգության ապահովման հարցում, և մենք շահագրգռված ենք տարածաշրջանում կայունության պահպանման հարցում»,- ասել է Սերգեյ Շոյգուն։

Արշակ Կարապետյանն իր հերթին նշել է, որ «Ռուսաստանը միակ պետությունն է, որը հայ ժողովրդին անվտանգության իրական շոշափելի արդյունք է տալիս»։

«Այսօր Ռուսաստանը զբաղվում է անվտանգության հարցերով ոչ միայն Լեռնային Ղարաբաղում, այլև անմիջապես Հայաստանի սահմաններին: Մենք պատրաստ ենք սերտ և արդյունավետ համագործակցության»,- ասել է նա, տեղեկացնում է Mediamax.am-ը։