Դիմակ կրելու պահանջն արդիական է. Առողջապահության նախարարությունը զգոնության կոչ է անում

COVID-19–ի հերթական ալիքին դիմակայելու նպատակով՝ Առողջապահության նախարարությունը զգոնության կոչ է անում, տեղեկացնում է News.am-ը:

«Հայաստանում COVID-19-ով հիվանդացության ցուցանիշն աճման միտում ունի: Նոր շտամների հայտնաբերումն ու հաստատումն իրավիճակն առավել մտահոգիչ է դարձնում, հատկապես, նոր ուսումնական տարվա մեկնարկից առաջ:

Համավարակի շղթան կոտրելու, վարակի տարածումը կանխելու և իրավիճակը վերահսկելիի սահմաններում պահելու համար Ոստիկանությունը և տեսչական մարմիններն այսօրվանից իրականացնում են խստացված ստուգումներ հանրային վայրերում և փակ տարածքներում:

Հիշեցնենք`

• փակ տարածքներում դիմակ կրելը պարտադիր է,

• COVID-19-ից պաշտպանվելու արդյունավետ միջոցը պատվաստումն է:

Միաժամանակ, COVID-19-ի տարածման ռիսկը նվազեցնելու նպատակով առողջապահության նախարարությունը ևս կրկին հորդորում է պահպանել հակահամաճարակային կանոնները՝

• կրե՛ք դիմակ,

• պահպանե՛ք ձեռքերի հիգիենան, պարբերաբար ախտահանե՛ք ձեռքերը 70%-անոց ալկոհոլային հիմքով ախտահանիչով,

• պահպանե՛ք սոցիալական հեռավորություն,

• հաճախակի օդափոխե՛ք փակ տարածքները»,– ասվում է Առողջապահության նախարարության տարածած հաղորդագրության մեջ։