ԾԵԾԿՌՏՈՒՔ ԱԺ-ՈՒՄ, ԳՈՐԾԻ ԴՐՎԵՑԻՆ ԱԹՈՌՆԵՐԸ (ՏԵՍԱՆՅՈՒԹ)

ՀՀ վարչապետ Նիկոլ Փաշինյանը երեքշաբթի ԱԺ–ում ներկայացնում է կառավարության ծրագիրը, որը, սակայն, հարթ չի անցնում։

Նիստի սկզբում դահլիճից ցուցադրաբար հեռացան «Պատիվ ունեմ» ընդդիմադիր խմբակցության պատգամավորները։

Փաշինյանին հարցեր տալու ժամանակ դահլիճ վերադարձած «Պատիվ ունեմի» պատգամավոր Աննա Մկրտչյանը հիշեցրեց վարչապետին, որ նա ավելի վաղ հայտարարել է, որ «տիրապետում է ինֆորմացիայի, որը կարող է պայթեցնել Ադրբեջանը»։

Նա նաև նշեց, որ Փաշինյանն իր հետ բերել է մեծ թվով կողմնակիցներ։ Դրանից հետո դահլիճում սկսեցին լսվել «Քաղաքացիական պայմանագիր» իշխող խմբակցության պատգամավորների ձայները, որոնց ԱԺ նախագահ Ալեն Սիմոնյանը նկատողություն արեց, ինչից հետո հանձնարարեց անջատել Մկրտչյանի խոսափողը։

Փաշինյանը որևէ կերպ չարձագանքեց տեղի ունեցածին։ Բայց երբ ձայնի իրավունքը փոխանցվեց «Պատիվ ունեմի» մյուս պատգամավորին` Տիգրան Աբրահամյանին, Մկրտչյանը շարունակեց տեղից խոսել, ինչը Սիմոնյանը որակեց «սադրանք» և զրկեց նրան ձայնի իրավունքից ողջ նիստի ընթացքում։ Աբրահամյանը հարցրեց Փաշինյանին, թե ինչպես նա կմեկնաբանի իր պատգամավորների արձագանքը Մկրտչյանի հայտարարություններին և հարցրեց` կա արդյո՞ք Հայաստանի և Արցախի նոր տարածքների հանձնման վտանգ։ Փաշինյանը պատասխանեց, որ պատգամավորները «շատ մեղմ են» արձագանքում, բայց դահլիճում կրկին աղմուկ բարձրացավ։ Սիմոնյանը ներողություն խնդրեց վարչապետից և պահանջեց անվտանգության աշխատակիցներից դահլիճից դուրս հանել Մկրտչյանին, ինչից հետո ընդդիմադիր պատգամավորների և անվտանգության աշխատակիցների միջև սկսվեց ծեծկռտուք, գործի դրվեցին աթոռները։

Սիմոնյանը հայտարարեց 20 րոպեանոց ընդմիջում, ԱԺ նիստի հեռարձակումն ընդհատվեց, տեղեկացնում է Newsarmenia.am-ը։