Կոպիրկին. Կարևոր է շարունակել համագործակցության խորացումը

Բանակի և Ռուսաստանի միջև երկկողմ հարաբերությունների խորացման համար նորարարական մոտեցումներ են անհրաժեշտ: Այս մասին սեպտեմբերի 20-ին «Ռուս-հայկական տնտեսական համագործակցությունը. Հեռանկարային նախագծեր» կլոր սեղանի ժամանակ ասաց Հայաստանում Ռուսաստանի Դաշնության արտակարգ և լիազոր դեսպան Սերգեյ Կոպիրկինը:

Նրա խոսքով՝ երկու երկրների միջև սերտ տնտեսական հարաբերություններ են ձևավորվել: «Մենք դրա համար ունենք ամուր տնտեսական հիմք: Հայաստանում ռուսական բիզնեսի առաջատարներն են «Գազպրոմ Արմենիա»-ն, «Ռոսնեֆտ»-ը, «Հարավկովկասյան երկաթուղի»-ն, «Գեոպրոմայնինգ»-ն, «Տաշիր գրուպ»-ը և «Յանդեքս»-ը: Փոքր և միջին բիզնեսի ոլորտը նույնպես հատուկ ուշադրության է արժանի: Տնտեսական համագործակցությունը հիմք է ստեղծում մեր հարաբերությունների ամբողջ շրջանակի, ռազմավարական դաշինքի համար», - ասել է Կոպիրկինը:

Այդուհանդերձ, ըստ դիվանագետի, կարևոր է կանգ չառնել և շարունակել խորացնել առկա համագործակցությունը՝ այն ընդլայնելով խոստումնալից ուղղություններով:

Դեսպանը նշեց, որ նոր ստեղծագործական և նորարարական մոտեցումներ պահանջում է հենց կյանքը, տարածաշրջանային և միջազգային գործընթացների զարգացման տրամաբանությունը:

«Այս տրամաբանությունն այնպիսին է, որ դինամիզմ և նորարարական մոտեցում է անհրաժեշտ՝ համագործակցության ձեռք բերված մակարդակը պահպանելու և առավել ևս՝ դրա մակարդակը բարձրացնելու համար: Միայն դա կապահովի մրցունակություն, կամրապնդի ռուսական բիզնեսի դիրքերը Հայաստանում և հակառակը: Սա կարևոր է նաև՝ հաշվի առնելով տարածաշրջանային հաղորդակցությունների բացման հեռանկարը, որի ուղղությամբ ակտիվ աշխատում է Ռուսաստանի Դաշնությունը: Շատ կարևոր է, որ երկու կողմերից էլ լինի քաղաքական կամք: Դրա մասին է վկայում նաև այսօրվա միջոցառման մասնակիցների կազմը»,- ասել է Կոպիրկինը, տեղեկացնում է News.am-ը: