Ռուսաստանցի մասնագետները կօգնեն, որ ՀՀ-ում ճանապարհները կառուցեն ժամանակակից տեխնոլոգիայով

Ռուսական ճանապարհային գիտահետազոտական ինստիտուտը մտադիր է Հայաստանում ներկայացուցչություն բացել։ Տեղեկությունը Sputnik Արմենիային հայտնեց գիտահետազոտական ինստիտուտի փոխտնօրեն Վլադիմիր Մարտինսոնը։

Ինստիտուտն արդեն իսկ սկսել է համագործակցել Հայաստանի կառավարությանն առընթեր ճանապարհային դեպարտամենտի հետ և որակի տեխնիկական վերահսկողություն է իրականացնում Հայաստանում ճանապարհաշինարարական 8 օբյեկտում։

Հայաստանում նախատեսվում է ներկայացուցչություն բացել հաջորդ տարի, և շինարարական վերահսկողությունից բացի, ինստիտուտը պատրաստ է հայկական կողմին օգնել կատարելագործել ճանապարհային շինարարության նորմատիվները։

Նախկինում ԱՊՀ երկրներում այդ նորմատիվները մոտավորապես նույնն էին, քանի որ հիմնվում էին խորհրդային նորմերի վրա։ Սակայն մի քանի տարի առաջ ԵԱՏՄ–ում "Ավտոճանապարհների անվտանգություն" տեխնիկական կանոնակարգը մտցվեց, որտեղ արմատապես վերանայվել էին ասֆալտի, բետոնի, այլ նյութերի վերաբերյալ, ինչպես նաև գործնականում դրանց կիրառման պահանջները` հաշվի առնելով եվրոպական և ամերիկյան առաջատար տեխնոլոգիաները։ Արդյունքում ճանապարհային տնտեսության նորմատիվային բազան վերանայվեց Ռուսաստանում, ինչպես նաև Բելառուսում և Ղազախստանում։

«Հայաստանը ևս ընդունել է ԵԱՏՄ տեխնիկական այդ կանոնակարգը, այդ պատճառով կարևոր է, որ նորմատիվները կատարելագործվեն նաև այստեղ։ Մենք պատրաստ ենք օգնել այդ հարցում», – ընդգծեց Մարտինսոնը։

Հարցին, թե ինստիտուտը պատրա՞ստ է մասնակցել Հյուսիս–հարավ մայրուղու որակի ստուգման մրցույթին, նա պատասխանեց. «Մենք պատրաստ ենք մեր փորձն ու գիտելիքներն առաջարկել ամենուր, որտեղ դա անհրաժեշտ է»։

Նշենք, որ Հայաստանը շուտով սկսելու է Սիսիանից Քաջարան տանող նոր ճանապարհ կառուցել։ 8,6 կմ թունելով այս ճանապարհահատվածը զգալիորեն կկրճատի երկրի հարավային լեռնային հատվածով երթևեկելու ժամանակը։ Ճանապարհը կառուցվելու է Հյուսիս–հարավի շրջանակում, որը կընդլայնի նաև Իրանի հետ սահմանից մինչև Վրաստանի հետ սահմանն ընկած միջանցքը, կկրճատի երթևեկության ժամանակը և կբարձրացնի ճանապարհի թողունակությունը։