Կարինե Գևորգյան․ «Զանգեզուրի միջանցք» ստեղծելու գաղափարը լցրել է Իրանի համբերության բաժակը

Ադրբեջանի նկատմամբ Իրանի դիրքորոշման կոշտացումը կապված է մի շարք համալիր գործոնների հետ, իսկ «Զանգեզուրի միջանցք» ստեղծելու մասին գաղափարն այն կաթիլն էր, որը լցրել է Թեհրանի համբերության բաժակը: Այդ մասին News.am-ի թղթակցի հետ զրույցում հայտարարել է ռուսաստանցի փորձագետ, իրանագետ Կարինե Գևորգյանը:

Նա նշել է, որ Իրանը բավականին լարված վերաբերմունք ունի միջանցք ստեղծելու գաղափարի շուրջ, դեմ է դրա իրացմանը, քանի որ այն սպառնում է ԻԻՀ-ի շահերին:

Թեհրանը, ինչպես պարզաբանել է Գևորգյանը, պայքարում է սեփական շահերի համար, որոնք համընկնում են հայկական կողմից շահերի հետ:

«Իրանի դիրքորոշման կոշտացման ևս մեկ պատճառ է Ադրբեջանի պանթյուրքացումը, որը սպառնում է իրանական Ադրբեջանում սեպարատիզմով: Այդպիսի քարոզչությունը ստեղծում է խնդիրներ Իրանի ներսում: Բացի այդ, Թեհրանը մեկ տարի առաջ՝ Ղարաբաղում պատերազմի ժամանակ, հետևել է Ադրբեջանի և Իսրայելի հետ դաշնակցային համագործակցությանը, ինչի արդյունքում իսրայելական անօդաչուները հայտնվել էին Իրանում»,-հավելել է փորձագետը:

«Բաքուն, որ չափազանց շատ էր հենվել Թուրքիայի օգնության վրա, բավականին անփույթ վարք է դրսևորել Թեհրանի նկատմամբ: Ի պատասխան՝ մենք լսել ենք նաև Իրանի ԶՈՒ Գենշտաբի ղեկավարի հայտարարությունը, որ 4000 հրթիռ կարող է ոչնչացնել Բաքուն: Իրանում մշտապես հիշեցնում են Ադրբեջանին, որ ոչինչ չի մոռացվել, ամեն ինչ հսկողության տակ է: Թեհրանը դիտարկում է այդ ամենը համալիր կերպով և դեռևս համբերություն է ցուցաբերում»,-եզրափակել է իրանագետը: