Լոքդաունի չենք գնալու. Պետք է խստացնենք դիմակների կրումը, գուցե նաև բաց տարածքներում

Մենք չպետք է գնանք լոքդաունների և պետք է երկու ուղղությամբ աշխատենք: Այս մասին, այսօր՝ հոկտեմբերի 28-ին, կառավարության նիստում հայտարարեց ՀՀ վարչապետ Նիկոլ Փաշինյանը, տեղեկացնում է News.am-ը:

«Առաջինը դիմակների կրման կանոնների խստացումը և չի բացառվում, որ մենք այստեղ նոր որոշումներ կայացնենք: Ընդ որում չի բացառվում, որ գնանք նաև բաց տարածքներում դիմակ կրելու անհրաժեշտությանը: Սա արվում է նրա համար, որ այդպես ավելի հեշտ է վերահսկել: Որովհետև եթե առանց դիմակի մարդ կա, նշանակում է՝ ոստիկանության և տեսչական մարմինների համար աշխատանքը կհեշտանա:

Երկրորդ և կարևոր ուղղությունը պատվաստումն է: Մենք բոլոր քաղաքացիներին պատվաստելու հնարավորությունն ունենք»,-ասաց նա:

Վարչապետը ցավով տեղեկացրեց, որ այս պահին մեկ տասնյակից ավելի քրեական գործեր կան, որտեղ որպես բուժաշխատողներ են որպես մեղադրյալ ներգրավված. «Ունենք կալանավորված անձինք, եթե չեմ սխալվում 6 հոգի, պատվաստման կեղծ սերտիֆիկատ տալու դեպքերում»:

Նիկոլ Փաշինյանն անդրադարձավ ՀՀ նախագահի նստավայրում տեղի ունեցած միջոցառմանը, որտեղից լուսանկար էր տարածվել, և պաշտոնյաներից գրեթե ոչ մեկը դիմակով չէր. «Հարգելիներս,. Քաղաքացիներն էլ հարսանիք ենա նում, միջոցառումներ են անում, սեղանի շուրջ կամ միջոցառման ժամանակ սուրճ խմելիս մարդիկ դիմակ կրո՞ւմ են; Էս էժան շահարկումներին պետք է չտրվել: Այսօր մահերի պատասխանատվությունը կրում են այն մարդիկ, որոնք իրականացնում են հակապատվաստումային քարոզչություն»: