Շոյգու․ Ղարաբաղում տեղակայված խաղաղապահները հանդարտեցրել են բարդ իրավիճակը

ՌԴ պաշտպանության նախարար Սերգեյ Շոյգուն այսօր խորհրդակցության ժամանակ ասել է, որ Լեռնային Ղարաբաղում տեղակայված ռուսական խաղաղապահ զորախումբը իրականացրել է թշնամական կողմերին բաժանելու խնդիրն ու այժմ լուծում է պլանային առաջադրանքները։

«Մեր խաղաղապահներին տեղակայելով` հասցրել ենք հանդարտեցնել իրավիճակն ու շարունակել պլանային աշխատանքների իրականացումը։ Այժմ դրանք արդեն կարելի է պլանային անվանել։ Կյանքն աստիճանաբար վերադառնում է այս տարածաշրջան։ Խաղաղությունն ու հանգստությունը գնալով ավելի են ամրապնդվում», – ասել է Շոյգուն։

Նրա խոսքով` դրանում մեծ է բոլոր նրանց վաստակը, ովքեր զբաղվել են բուժօգնություն և մարդասիրական օգնություն ցուցաբերելով։

«Դե, իհարկե նաև բոլոր նրանց, ովքեր շուրջօրյա ռեժիմով կանգնած են խաղաղապահների դիրքերում», – ասել է նախարարը։

Նա շնորհակալություն է հայտնել ԼՂ–ում, Սիրիայում, ինչպես նաև արտերկրում ռուսական մյուս բազաներում ծառայություն իրականացնող բոլոր հրամանատարներին, զինծառայողներին, շարքայիններին և սերժանտական կազմին։

«Բայց հատկապես` այդ երկու կետում։ Այն ամենը, ինչ եղավ մեկ տարի առաջ Ղարաբաղում, երբ ծայրահեղ ծանր, սուր իրավիճակ էր, մեր գերագույն գլխավոր հրամանատարի ջանքերով, որը վարում էր այդ բանակցությունները, այդ աշխատանքը գրեթե շուրջօրյա ռեժիմով, հաղթահարված է», – նշել է Շոյգուն։

Նախարարը շնորհակալություն է հայտնել նաև ռազմական շինարարներին, որոնք մեկ տարվա ընթացքում ավելի քան 3000 օբյեկտ են շահագործման հանձնել, տեղեկացնում է News.am-ը։