Последние новости

Բլինքեն. ԱՄՆ-ը և ԵՄ-ն աշխատում են պաշտպանել Եվրոպա էներգապաշարների մատակարարումները

Միացյալ Նահանգները և Եվրամիությունը աշխատում են «ուկրաինական ճգնաժամի հետ կապված իրարանցումից» պաշտպանել Եվրոպա էներգապաշարների մատակարարումները: Այս մասին հայտարարել է ԱՄՆ պետքարտուղար Էնթոնի Բլինքենը՝ ԵՄ ԱԳ նախարար Ժոզեպ Բորելի հետ ճեպազրույցի ժամանակ։

«Մենք համակարգում ենք գործողությունները մեր դաշնակիցների և գործընկերների, էներգետիկ ոլորտում շահագրգիռ կողմերի հետ, ներառյալ այն, թե ինչպես կարելի է լավագույնս կիսել էներգետիկ պաշարները, եթե Ռուսաստանը փակի ծորակը կամ հրահրի հակամարտություն, որը կխաթարի գազի հոսքը Ուկրաինայի տարածքով»,- ասել է Բլինքենը:

Բլինքենը խոստացել է «իրական և խորը հետևանքներ, եթե Ռուսաստանը որոշի շարունակել իր ագրեսիան»։

«Մենք մշակել ենք շատ արդյունավետ և արագ արձագանք, որը հսկայական ծախսեր կբերի ռուսական տնտեսության և ֆինանսական համակարգի համար, ներառյալ պատժամիջոցները և արտահանման զգալի վերահսկողությունը»,- ասել է Բլինքենը՝ հավելելով, որ ԵՄ-ն «լրացուցիչ» գործողություններ է նախապատրաստում։

Նրա խոսքով՝ այդ ջանքերը ներառում են իմպուլսային էներգիայի մատակարարում և էներգիայի պաշարների համատեղ օգտագործում: «Մենք և մեր դաշնակիցներն ու գործընկերները միասնական ենք բոլոր ճակատներում»,- ընդգծել է Բլինքենը:

«Երբ 2009 թվականին Ուկրաինայի հետ վեճի պատճառով Ռուսաստանը դադարեցրեց գազի մատակարարումը, մարդիկ մահանում էին ցրտից: Իսկ երբ էներգիակիրները դադարում են գալ, տնտեսությունը փլուզվում է»,- ասել է նա: «Մենք վճռական ենք թույլ չտալ դա և մեղմել ազդեցությունը մատակարարումների և էներգակիրների գների վրա, եթե Ռուսաստանը որոշի կրճատել մատակարարումները»:

Բորելն ասել է, որ ԱՄՆ-ից և ԵՄ-ից գործընկերները գտնվում են «արագ հավաքման ռեժիմում»՝ համակարգելով «Ուկրաինայում Ռուսաստանի սպառնալիքների» պատասխանը։

Նա ընդգծել է, որ նպատակն է դառնալ ածխածնային չեզոք՝ միաժամանակ վերացնելով անվտանգության կարճաժամկետ ռիսկերը՝ «ռուսական և Ղրիմի ճգնաժամի» համատեքստում։

«Ռուսաստանը չի վարանում օգտագործել Եվրոպայի զգալի էներգառեսուրսները՝ որպես լծակ աշխարհաքաղաքական ձեռքբերումների համար»,- ասել է նա։ «և երբ Եվրամիությունում գազի գները 6-10 անգամ բարձր են, քան մեկ տարի առաջ… դա մեծ ազդեցություն է թողնում սպառողների և տնտեսության վրա»:

Բորելն ասել է, որ երկրների համար կարևոր է դիվերսիֆիկացնել էներգիայի աղբյուրները և դա անել հանածո վառելիքից վերականգնվող էներգիայի անցնելու միջոցով: «Սա կլիմայի փոփոխության դեմ պայքարի լավագույն միջոցն է»։

«Մենք հավատում ենք, որ ճգնաժամից դուրս գալու դիվանագիտական ելքը դեռևս հնարավոր է, և սա մեր առաջնահերթությունն է, և այստեղ մենք ներդնում ենք մեր բոլոր ջանքերը։ Բայց միևնույն ժամանակ մենք հաստատակամ ենք մեր վճռականության մեջ, որ Ուկրաինայի դեմ հետագա ագրեսիան լուրջ հետևանքներ կունենա։ Մենք լավագույնի հույս ունենք, բայց պատրաստվում ենք վատագույնին: Եթե Ռուսաստանը շարունակի ագրեսիայի ճանապարհով ընթանալ, Եվրամիության և ԱՄՆ-ի գործողությունները սերտորեն կհամակարգվեն, այդ թվում՝ պատժամիջոցների առումով»,- վստահեցրել է նա, տեղեկացնում է News.am։

    ПОСЛЕДНИЕ ОТ АВТОРА






    ПОСЛЕДНЕЕ ПО ТЕМЕ