Էմանուել Մակրոն. Մենք Ռուսաստանի դեմ չենք պատերազմում

Մենք Ռուսաստանի դեմ չենք պատերազմում, ասել է Ֆրանսիայի նախագահ Էմանուել Մակրոնը՝ ազգին ուղղված ուղերձում։

Նրա խոսքով՝ Ուկրաինայի պատերազմը «պառակտում» է ստեղծել Եվրոպայում։

«Հենց նախագահ Պուտինը, մեկը մյուսի հետևից դավաճանելով իր միջազգային պարտավորություններին, պատերազմն ընտրեց»,- ասել է Մակրոնը։ «Այս պատերազմը հակամարտություն չէ Արևմուտքի և Ռուսաստանի միջև, ինչպես ոմանք կցանկանային, որ մենք մտածեինք: Ուկրաինայում ՆԱՏՕ-ի բազա չկա։ Դա սուտ է։ Ռուսաստանը ագրեսիայի օբյեկտ չէ, նա ագրեսոր է։ Այս պատերազմը նացիզմի դեմ պայքար չէ… Դա սուտ է»,- հավելել է Մակրոնը։

Նա ասել է, որ մեծ նշանակություն է տալիս Ռուսաստանի և Ուկրաինայի նախագահներ Վլադիմիր Պուտինի և Վլադիմիր Զելենսկու հետ կապերի պահպանմանը։ Ֆրանսիայի առաջնորդն ասել է, որ կապի մեջ է Պուտինի հետ, որպեսզի «համոզի նրան հրաժարվել զենքից», ինչպես նաև կանխել «հակամարտության ընդլայնումը»:

Մակրոնը նշել է, որ Ռուսաստանի ներխուժումն Ուկրաինա ընդգծեց եվրոպական պաշտպանական ռազմավարությունը նոր փուլ տեղափոխելու անհրաժեշտությունը։ Մակրոնը նաև հայտարարել է, որ մարտի 10-ին և 11-ին Վերսալում կհյուրընկալի եվրոպացի առաջնորդների գագաթաժողովը՝ էներգետիկ անկախությունն ու պաշտպանությունը քննարկելու համար։

Միևնույն ժամանակ, Էմանուել Մակրոնը խոստովանել է, որ Ֆրանսիայի տնտեսությունը կտուժի Ուկրաինայի պատերազմի հետևանքներից, և իր կառավարությունը կաշխատի պաշտպանել տնային տնտեսություններին ճնշումներից, այդ թվում՝ գների աճից։ Նա զգուշացրել է, որ «առաջիկա օրերը, ամենայն հավանականությամբ, ավելի ու ավելի դժվար կլինեն»:

«Պատերազմն, անկասկած, կազդի ամբողջ Եվրոպայի, այդ թվում՝ Ֆրանսիայի վրա, որտեղ բենզինի, գազի, ամենօրյա օգտագործման ապրանքների գները, ըստ ամենայնի, կբարձրանան»: Նա զգուշացրել է, որ «կտուժեն մեր ֆերմերները, մեր արդյունաբերությունը և տնտեսության մի շարք ոլորտներ»։

«Ես վարչապետին խնդրել եմ առաջիկա օրերին տնտեսական և սոցիալական կայունության ծրագիր մշակել»՝ հակամարտությունից բխող դժվարություններին արձագանքելու համար»,- ասել է Մակրոնը, տեղեկացնում է News.am-ը։