Օլեգ Դերիպասկա. Երկաթե վարագույրն արդեն իջել է

«Ռուսալ» և «EN+Group» միավորված ընկերության ղեկավար Օլեգ Դերիպասկան Ռուսաստանի ներկայիս տնտեսական իրավիճակը համեմատել է 1998թ․ դեֆոլտի հետ։ Նա հայտարարել է, որ երկիրը նախկինում երբեք նման մարտահրավերների չի բախվել։ Այս մասին նա ասել է Կրասնոյարսկի տնտեսական ֆորումի ժամանակ, հաղորդում է NGS24.ru-ն։

«Մենք դեռ երբեք նման մարտահրավերների չենք բախվել։ Երկաթե վարագույրն արդեն իջել է։ Ինձ շատ են խնդրում, որ դա չասեմ, բայց ես խաղաղության կողմնակից եմ։ Երեք շաբաթից պարզ կդառնա, թե ինչ կլինի բանկերի հետ։ Տեսնենք, թե ովքեր կմնան մեր գործընկերներից։ Կարծում եմ, մենք շատ կզարմանանք՝ տեսնելով, թե նրանցից քանիսն են մնացել։ Նրանց հնարավոր կլինի հաշվել մատների վրա։ <…> Վերցնենք 1998թ․ ճգնաժամը և բազմապատկենք երեքով»,- ասել է Դերիպասկան՝ խոսելով այն մասին, թե ինչպես կազդեն պատժամիջոցները երկրի տնտեսության վրա։

«Մենք ունենք տնտեսություն․ 18 տրիլիոն դոլար այս տարի միայն Չինաստանում: Եթե նշեք մնացած բոլոր թվերը, ապա դա շատ ավելի է, քան Եվրոպայում, այլ դինամիզմով: Լավ, նրանք մեզ չեն ուզում, մենք արդեն պետք է մոռանանք»,- ասել է Դերիպասկան, հաղորդում է Интерфакс-ը։

Նա նշել է, որ երկրին անհրաժեշտ է «կառավարման համակարգի» փոփոխություն։ «Ես միշտ ասում եմ. դա ուտոպիա է, բայց ինչո՞ւ է մեզ պետք մայրաքաղաք՝ Մոսկվայում, եթե մեր բոլոր շահերն Ասիայում են: Եվ ամեն ինչ այլ տեսք կունենա, եթե այն (մայրաքաղաքը) գտնվի Կրասնոյարսկում, Նովոսիբիրսկում»,- ասել է Դերիպասկան։

«Մենք պատրաստ չենք այս քայլին։ եկեք կառավարման մի մասը տեղափոխենք այստեղ (Սիբիր): Կստեղծվեն նոր բանկեր և նոր ֆինանսական հաստատություններ։ Պարզ բաների համար Մոսկվա մեկնելու իմաստը ո՞րն է»,- նշել է նա։

Նա ընդգծել է, որ Արևելյան Սիբիրում ենթակառուցվածքների բացակայությունը նույնպես խոչընդոտում է Ասիայի հետ տնտեսական կապերի զարգացմանը։

Նա հավելել է, որ նոր իրավիճակի հետ կապված՝ ինքը պատրաստ է մի շարք առաջարկներ անել, սակայն դրանք քննարկելն իմաստ ունի միայն խաղաղության հաստատումից հետո, տեղեկացնում է News.am-ը։